சிவகாசியில் இன்று செய்தியாளர்களைச் சந்தித்த தமிழ்நாடு காங்கிரஸ் கமிட்டி தலைவர் செல்வப்பெருந்தகை, தேர்தல் ஆணையத்தின் பாரபட்சமான நடவடிக்கைகள் மற்றும் நாம் தமிழர் கட்சி ஒருங்கிணைப்பாளர் சீமானின் அரசியல் எதிர்காலம் குறித்துப் பரபரப்பான கருத்துகளைத் தெரிவித்தார். தேர்தல் ஆணையம் பாஜக-வுக்கு ஆதரவாகச் செயல்படுவதாகச் செல்வப்பெருந்தகை குற்றம் சாட்டினார்.

"தெலுங்கானா அமைச்சர் உத்தம்குமார் ரெட்டி மதுரையிலிருந்து சிவகாசிக்கு ஹெலிகாப்டரில் வரத் தேர்தல் ஆணையம் அனுமதி மறுத்துள்ளது. பாஜக தலைவர்களுக்கு உடனடி அனுமதி வழங்கும் ஆணையம், காங்கிரஸ் தலைவர்களின் பிரச்சாரத்தைத் திட்டமிட்டு முடக்குகிறது." இந்தியத் தேர்தல் ஆணையம் ஒரு சார்பாகச் செயல்படுவதை இந்தியா முழுவதும் உள்ள 'இந்தியா' (INDIA) கூட்டணி முறியடிக்கும் எனவும் அவர் கூறினார்.

நாம் தமிழர் கட்சி குறித்துப் பேசுகையில், "தமிழகத்தில் சீமான் கட்சியினர் எந்தத் தொகுதியிலும் வெற்றி பெற முடியாது" என அவர் திட்டவட்டமாகக் கூறினார்: "சீமானைப் பின்தொடர்ந்த ஆதரவாளர்களும், அவரது வாக்குகளும் இப்போது விஜய்யிடம் (தவெக) சென்றுவிட்டன. இதனைச் சீமான் கவனிக்க வேண்டும்."

"காரைக்குடி தொகுதியில் சீமான் போட்டியிட்டாலும் அங்குக் காங்கிரஸ் வேட்பாளர் மாங்குடி தான் வெற்றி பெறுவார். 140 ஆண்டுப் பாரம்பரியம் கொண்ட காங்கிரஸ் கட்சியை, நேற்று முளைத்த காளானான சீமான் விமர்சிப்பதா? நாங்களும் பேசினால் அவருக்குத் தான் சங்கடம் ஏற்படும்." தொகுதி மறுவரையறை குறித்து அண்ணாமலை கூறிய கருத்திற்கும் அவர் பதிலடி கொடுத்தார்.

"மக்கள் தொகை அடிப்படையில் 39 தொகுதிகள் 59-ஆக மாறும் என அண்ணாமலை கூறுவதைத் தமிழக மக்கள் நம்பத் தயாராக இல்லை. பாஜக-வின் எந்தச் சதித்திட்டமும் தமிழகத்தில் எடுபடாது" என அவர் தெரிவித்தார். திமுக கூட்டணியில் 41 இடங்களைக் கேட்டதாகவும், தற்போது 23 கட்சிகள் உள்ள கூட்டணியில் ஒருமித்த கருத்துடன் செயல்பட்டு வருவதாகவும் செல்வப்பெருந்தகை தனது பேட்டியின் போது குறிப்பிட்டார்.