கிருஷ்ணகிரி மாவட்டம் ஊத்தங்கரை தொகுதி தவெக எம்.எல்.ஏ இளையராஜாவிடம் பல கோடி ரூபாய் பேரம் பேசிய வழக்கில், தம்மைக் கைது செய்யப் பெங்களூரு, திருச்சி உள்ளிட்ட 4 நகரங்களில் தனிப்படை போலீசார் தீவிர தேடுதல் வேட்டையில் ஈடுபட்டு வரும் நிலையில், முன்னாள் அமைச்சர் செந்தில் பாலாஜியின் சகோதரர் அசோக் குமார் தற்பொழுது சென்னை உயர் நீதிமன்றத்தில் அவசரமாக முன்ஜாமீன் கோரி மனுத்தாக்கல் செய்துள்ளார்.

தவெக சட்டமன்ற உறுப்பினரான இளையராஜாவைத் தொடர்புகொண்டு, அவர் கட்சி மாறுவதற்காகப் பெருந்தொகையைப் பேரம் பேசிய விவகாரத்தில் காவல்துறையின் விசாரணையில் திடுக்கிடும் தகவல்கள் வெளியாகியுள்ளன. தவெக எம்.எல்.ஏ-விடம் சுமார் 35 கோடி ரூபாய் வரை பேரம் பேசியதாகத் திருநாவுக்கரசு என்பவர் உள்ளிட்ட இடைத்தரகர்கள் 9 பேரைத் தனிப்படை போலீசார் ஏற்கனவே அதிரடியாகக் கைது செய்து சிறையில் அடைத்துள்ளனர்.

சிறையில் உள்ள திருநாவுக்கரசு உள்ளிட்ட நபர்களிடம் நடத்தப்பட்ட ரகசிய விசாரணையில், இந்த குதிரைப்பேரச் சதித் திட்டத்தில் பின்னணியில் இருந்து இயக்கியவர்களுடன் அசோக் குமார் நெருங்கிய தொடர்பில் இருந்தது தொழில்நுட்ப ஆதாரங்களுடன் உறுதி செய்யப்பட்டது. இதனையடுத்து இந்த வழக்கில் அசோக் குமார் முக்கியக் குற்றவாளியாகச் சேர்க்கப்பட்டார்.

போலீசார் தன்னை எந்த நேரமும் கைது செய்யலாம் என்பதால், தலைமறைவாக இருந்தபடியே தனது வழக்கறிஞர்கள் மூலம் சென்னை உயர் நீதிமன்றத்தில் அசோக் குமார் இன்று அவசர மனு ஒன்றைச் சமர்ப்பித்துள்ளார்.  "இந்த வழக்கிற்கும் எனக்கும் எவ்வித நேரடித் தொடர்பும் இல்லை. அரசியல் காழ்ப்புணர்ச்சி காரணமாகவே எனது பெயர் இதில் இழுக்கப்பட்டுள்ளது. எனவே, எனக்கு நிபந்தனையற்ற முன்ஜாமீன் வழங்க வேண்டும். காவல்துறையின் விசாரணைக்கு முழுமையாக ஒத்துழைக்கத் தயாராக இருக்கிறேன்," என அந்த மனுவில் குறிப்பிடப்பட்டுள்ளதாகத் தெரிகிறது.

முன்னாள் அமைச்சர் அனிதா ராதாகிருஷ்ணனின் முன்ஜாமீன் மனு இன்று காலை தள்ளுபடி செய்யப்பட்டு, அடுத்த 90 நிமிடங்களில் அவர்  கைது செய்யப்பட்ட சம்பவத்தைத் தொடர்ந்து, அசோக் குமாரின் இந்த முன்ஜாமீன் மனு சென்னை உயர் நீதிமன்றத்தில் மிகுந்த எதிர்பார்ப்பை ஏற்படுத்தியுள்ளது.

இந்த அவசர மனுச் சென்னை உயர் நீதிமன்றத்தில் இன்னும் சற்று நேரத்தில் நீதிபதி முன்னிலையில் விசாரணைக்கு வரவுள்ளது. அரசுத் தரப்பில் அசோக் குமாரின் மனுவை எதிர்த்துக் கடுமையான வாதங்கள் முன்வைக்கப்பட உள்ளதாகக் கூறப்படுவதால், நீதிமன்றம் எடுக்கப் போகும் முடிவு தவெக மற்றும் திமுக அரசியல் வட்டாரங்களில் தற்பொழுது மிக உன்னிப்பாகக் கவனிக்கப்பட்டு வருகிறது.