நாம் தமிழர் கட்சியின் மிக முக்கிய நிர்வாகிகளில் ஒருவரான வழக்கறிஞர் பாசறைச் செயலாளர் சங்கர், கட்சியின் அனைத்துப் பொறுப்புகள் மற்றும் அடிப்படை உறுப்பினர் பதவியிலிருந்து விலகுவதாக அதிரடியாக அறிவித்துள்ளார். தமிழக வெற்றிக் கழகம் உள்ளிட்ட புதிய அரசியல் மாற்றங்களுக்கு மத்தியில், நாம் தமிழர் கட்சியின் முக்கிய நிர்வாகிகள் அடுத்தடுத்து விலகி வருவது அரசியல் வட்டாரத்தில் பெரும் பரபரப்பை ஏற்படுத்தியுள்ளது.

கட்சியின் வழக்கறிஞர் பாசறைச் செயலாளராகப் பொறுப்பு வகித்து வந்த சங்கர், நாம் தமிழர் கட்சியின் ஒருங்கிணைப்பாளர் சீமானுக்காகப் பல்வேறு முக்கியச் சட்டப் போராட்டங்களையும், வழக்குகளையும் முன்னின்று நடத்தியவர் ஆவார். அதுமட்டுமின்றி, கடந்த சட்டமன்றத் தேர்தலின் போது சென்னை அண்ணா நகர் தொகுதியில் நாம் தமிழர் கட்சியின் அதிகாரப்பூர்வ வேட்பாளராகக் களம் இறங்கிப் போட்டியிட்டவர் என்பது குறிப்பிடத்தக்கது.

நாம் தமிழர் கட்சியில் கடந்த சில வாரங்களாகவே உட்கட்சிப் பூசல்களும், நிர்வாகிகளுக்குள் அதிருப்தியும் நிலவி வருவதாகக் கூறப்படும் நிலையில், இந்த ராஜினாமா அரங்கேறியுள்ளது. கடந்த வாரம் தான் கட்சியின் மாநில ஒருங்கிணைப்பாளரான முத்துப்பாண்டி தனது பதவியை ராஜினாமா செய்து கட்சியிலிருந்து விலகினார். அவர் விலகிய சுவடு மாறுவதற்குள், தற்போது சீமானின் மிக நெருக்கமான சட்ட ஆலோசகராகக் கருதப்பட்ட வழக்கறிஞர் சங்கரும் விலகியிருப்பது நாம் தமிழர் கட்சிக்குக் கூடுதல் பலவீனமாகப் பார்க்கப்படுகிறது.

முக்கியத் தலைவர்கள் மற்றும் களப்பணியாளர்கள் அடுத்தடுத்து நாம் தமிழர் கட்சியிலிருந்து விலகி வருவது, வரவிருக்கும் தேர்தல்களுக்கான கட்சியின் உள்கட்டமைப்பில் தொய்வை ஏற்படுத்தலாம் என்பதால், கட்சியின் தலைமை இந்த விவகாரத்தை எவ்வாறு கையாளப் போகிறது என்ற எதிர்பார்ப்பு அரசியல் விமர்சகர்களிடையே எழுந்துள்ளது.