சேலம் மாவட்டத்தில் 7 நாட்களேயான பச்சிளம் பெண் குழந்தை ஒன்றை ₹2 லட்சத்திற்கு விற்பனை செய்த அதிர்ச்சி விபரம் வெளிச்சத்திற்கு வந்துள்ளது.

சேலம் சந்தனக்காடு பகுதியைச் சேர்ந்தவர் சீனிவாசன். இவரது மனைவி கவிதா. இந்த தம்பதியினருக்கு ஏற்கனவே மூன்று குழந்தைகள் உள்ள நிலையில், கடந்த ஒரு வாரத்திற்கு முன்புதான் கவிதாவிற்கு நான்காவதாக ஒரு அழகான பெண் குழந்தை பிறந்துள்ளது. ஏற்கனவே மூன்று குழந்தைகள் இருப்பதால், நான்காவதாகப் பிறந்த இக்குழந்தையை வளர்க்கப் போதிய பொருளாதார வசதி இல்லை எனக் கூறி, சீனிவாசன் - கவிதா தம்பதியினர் குழந்தையை விற்க முடிவு செய்துள்ளனர்.

இதற்காகச் சில உள்ளூர் இடைத்தரகர்களை நாடிய அவர்கள், குழந்தை பேறு இல்லாமல் தவித்து வந்த ராமநாதபுரம் மாவட்டத்தைச் சேர்ந்த ஒரு தம்பதியினருக்கு, வெறும் 7 நாட்களேயான தங்களது பச்சிளம் பெண் குழந்தையை ₹2 லட்சத்திற்கு சட்டவிரோதமாகப் பேரம் பேசி விற்றுள்ளனர். 

பச்சிளம் குழந்தை விற்கப்பட்ட விபரம் குறித்து மாவட்ட குழந்தைகள் பாதுகாப்புப் பிரிவு அதிகாரிகளுக்கு ரகசியத் தகவல் கிடைத்துள்ளது. உடனே அவர்கள் இது குறித்துச் சேலம் மாநகர காவல் துறையினருக்குப் புகார் அளித்தனர். புகாரின் அடிப்படையில் உடனடியாகப் பாய்ந்த தனிப்படை போலீசார், ராமநாதபுரம் தம்பதியினரின் பிடியில் இருந்த 7 நாட்களேயான பச்சிளம் பெண் குழந்தையை அதிரடியாகச் சென்று பத்திரமாக மீட்டனர். மீட்கப்பட்ட குழந்தை  பாதுகாப்பிற்காகக் காப்பகத்தில் ஒப்படைக்கப்பட்டு, உரிய மருத்துவப் பரிசோதனைகள் வழங்கப்பட்டு வருகின்றன.

இந்த சட்டவிரோதக் குழந்தை விற்பனை தொடர்பாகக் குழந்தையைப் பெற்ற சீனிவாசன் - கவிதா தம்பதியினரிடம் போலீசார் தீவிர விசாரணை நடத்தி வருகின்றனர். மேலும், வறுமையில் வாடும் குடும்பங்களைக் குறிவைத்து, குழந்தை பேறு இல்லாத தம்பதிகளின் பட்டியலைத் தயார் செய்து, தமிழ்நாட்டின் பல்வேறு மாவட்டங்களில் இத்தகைய பச்சிளம் குழந்தைகள் விற்பனைக்கு மூளைச்சலவை செய்து வரும் பிரதான புரோக்கர்கள் மற்றும் இடைத்தரகர் கும்பலின் பின்னணி குறித்துச் சேலம் மாநகர காவல்துறை வழக்குப்பதிவு செய்து தீவிரமாகத் தேடி வருகிறது.