திருச்சியில் தனது நெருங்கிய நண்பர் தற்கொலை செய்துகொண்ட துக்கம் தாளாமல், வாலிபர் ஒருவர் தானும் தூக்கிட்டுத் தற்கொலை செய்துகொண்ட சம்பவம் அப்பகுதியில் அதிர்ச்சியை ஏற்படுத்தியுள்ளது.

விருதுநகர் மாவட்டம் ஸ்ரீவில்லிபுத்தூரைச் சேர்ந்தவர் அலெக்ஸ் பாண்டியன் (29). 11 ஆண்டுகளுக்கு முன்பு காதலித்துத் திருமணம் செய்துகொண்ட இவர், குடும்பத்தினரைப் பிரிந்து திருச்சி சோமரசம்பேட்டை அருகே உள்ள வாசன் வெளி பகுதியில் வசித்து வந்தார். அங்குள்ள தற்காப்புப் பயிற்சி மையம் ஒன்றில் தங்கி கூலி வேலை செய்து வந்துள்ளார்.

இதற்கிடையில், கணவன்-மனைவி இடையே ஏற்பட்ட கருத்து வேறுபாடு காரணமாக இவரது மனைவி இவரை விட்டுப் பிரிந்து சென்றுவிட்டார். இதனால் அலெக்ஸ் பாண்டியன் தனிமையில் வாடி வந்துள்ளார்.

தனிமையில் இருந்த அலெக்ஸ் பாண்டியனுக்கு அந்தப் பகுதியில் ஒரு சில நண்பர்கள் கிடைத்துள்ளனர். இந்நிலையில், அவரது நெருங்கிய நண்பர் ஒருவர் கடந்த சில நாட்களுக்கு முன்பு தற்கொலை செய்துகொண்டார். ஏற்கனவே மனைவியைப் பிரிந்த துயரத்தில் இருந்த அலெக்ஸ் பாண்டியன், நண்பரின் தற்கொலையால் பெரும் மன உளைச்சலுக்கு ஆளானார்.

நேற்று முன்தினம் தான் பணிபுரிந்து வந்த பயிற்சி மையத்திலேயே அலெக்ஸ் பாண்டியன் தூக்கிட்டுத் தற்கொலை செய்துகொண்டார். தகவல் அறிந்து வந்த சோமரசம்பேட்டை போலீசார், உடலைக் கைப்பற்றிப் பிரேதப் பரிசோதனைக்கு அனுப்பி வைத்தனர். இந்தச் சம்பவம் குறித்துப் போலீசார் வழக்குப் பதிவு செய்து மேலதிக விசாரணை நடத்தி வருகின்றனர்.