இலங்கையின் தெற்குப் பகுதியான மாத்தறை அருகே கடற்படையினர் நடத்திய சோதனையில், படகில் கடத்தி வரப்பட்ட சுமார் ரூ.500 கோடி மதிப்பிலான 475 கிலோ போதைப்பொருட்கள் பறிமுதல் செய்யப்பட்டுள்ளன.

மாத்தறையில் பிடிபட்ட பிளாஸ்டிக் படகு: இலங்கை மாத்தறை தலல்ல கடற்கரைப் பகுதியில் சந்தேகத்திற்கு இடமான வகையில் நிறுத்தி வைக்கப்பட்டிருந்த பிளாஸ்டிக் படகு ஒன்றை அந்நாட்டுக் கடற்படையினர் சோதனையிட்டனர். அப்போது அந்தப் படகில் மறைத்து வைக்கப்பட்டிருந்த 21 பெரிய பைகளைக் காவல்துறையினரும் கடற்படையினரும் கைப்பற்றினர்.

275 கிலோ ஐஸ் & 200 கிலோ ஹெராயின்: கைப்பற்றப்பட்ட பைகளைச் சோதனையிட்டதில், 10 பைகளில் 275 கிலோ 'ஐஸ்' போதைப்பொருள். 11 பைகளில் 200 கிலோ 'ஹெராயின்' போதைப்பொருள் என மொத்தம் 475 கிலோ அளவிலான ஆபத்தான போதைப்பொருட்கள் இருப்பது கண்டறியப்பட்டது.

தப்பி ஓடிய கடத்தல்காரர்களுக்கு வலைவீச்சு: கடற்படையினரைக் கண்டதும் கடத்தல்காரர்கள் படகு மற்றும் போதைப்பொருட்களைக் கடற்கரையிலேயே போட்டுவிட்டுத் தப்பிச் சென்றிருக்கலாம் எனக் கருதப்படுகிறது.

பறிமுதல் செய்யப்பட்டுள்ள இந்த போதைப்பொருட்களின் சர்வதேசச் சந்தை மதிப்பு சுமார் ரூ.500 கோடி இருக்கும் எனக் கடற்படை அதிகாரிகள் தெரிவித்துள்ளனர். தப்பி ஓடிய கடத்தல் கும்பலைத் தேடும் பணியிலும், இந்த கடத்தலின் பின்னணியில் உள்ள சர்வதேச வலையமைப்பைக் கண்டறியும் பணியிலும் காவல்துறையினர் தீவிர விசாரணையில் இறங்கியுள்ளனர்.