தமிழக சட்டமன்றத் தேர்தல் வாக்குப்பதிவு முடிந்து வாக்கு இயந்திரங்கள் சீல் வைக்கப்பட்டுள்ள நிலையில், திருச்சி கிழக்கு தொகுதியில் நள்ளிரவில் கள்ள ஓட்டு போடப்பட்டதாக எழுந்துள்ள புகார் பெரும் பரபரப்பை ஏற்படுத்தியுள்ளது.

திருச்சி கிழக்கு தொகுதிக்குட்பட்ட ஒரு குறிப்பிட்ட வாக்குச்சாவடியில், நேற்று நள்ளிரவு சுமார் 1 மணி அளவில் தி.மு.க.வினர் சிலர் தேர்தல் அதிகாரிகளுக்கு லஞ்சம் கொடுத்து கள்ள ஓட்டுகளைப் பதிவு செய்ததாகக் கூறப்படுகிறது. இதற்கு அங்கு பாதுகாப்புப் பணியில் இருந்த சில போலீசாரும் உடந்தையாக இருந்ததாகத் தமிழக வெற்றிக் கழக (தவெக) நிர்வாகிகள் குற்றம் சாட்டுகின்றனர்.

இந்தத் தகவல் கிடைத்தவுடன் தவெக நிர்வாகிகள் மற்றும் தொண்டர்கள் சம்பந்தப்பட்ட வாக்குச்சாவடிக்கு விரைந்து சென்றனர். அங்கு நள்ளிரவு நேரத்தில் வாக்குச்சாவடிக்குள் மர்ம நபர்கள் நடமாட்டம் இருந்ததைக் கண்டு அவர்கள் அதிகாரிகளிடம் கேள்வி எழுப்பினர்.

வாக்குச்சாவடிக்குள் நுழைய முயன்ற தவெக நிர்வாகிகளை அங்கிருந்த போலீசார் தடுத்து நிறுத்தியுள்ளனர். அப்போது இரு தரப்பிற்கும் இடையே கடும் வாக்குவாதம் ஏற்பட்டுள்ளது. ஒரு கட்டத்தில் போலீசார் தவெகவினரை அங்கிருந்து விரட்டியடித்ததாகக் கூறப்படுகிறது. இதனால் அந்தப் பகுதியில் நள்ளிரவில் பதற்றமான சூழல் நிலவியது.

வாக்குப்பதிவு முடிந்து இயந்திரங்கள் 'ஸ்டிராங் ரூம்' கொண்டு செல்லப்படுவதற்கு முன்னதாக இத்தகைய முறைகேடுகள் நடந்திருப்பதாகக் கூறி, தவெக சார்பில் தேர்தல் ஆணையத்திடம் புகார் அளிக்கத் திட்டமிடப்பட்டுள்ளது. இதுவரை எந்த வாக்குச்சாவடியிலும் மறு வாக்குப்பதிவுக்கு அவசியம் இல்லை எனத் தேர்தல் ஆணையம் இன்று காலை அறிவித்திருந்த நிலையில், இந்தப் புகார் தற்போது முக்கியத்துவம் பெற்றுள்ளது.