மராட்டிய மாநிலத்தில் கடந்த இரண்டு ஆண்டுகளில் மட்டும் சுமார் 93,000 பெண்கள் மாயமாகியுள்ளதாக வெளியாகியுள்ள அதிர்ச்சியூட்டும் புள்ளிவிவரங்கள் அம்மாநிலத்தில் பெரும் பரபரப்பை ஏற்படுத்தியுள்ளன. மத்திய உள்துறை அமைச்சகம் மற்றும் தேசிய குற்ற ஆவண காப்பகம் வெளியிட்டுள்ள தரவுகளின் அடிப்படையில், மராட்டியத்தில் பெண்கள் காணாமல் போகும் சம்பவங்கள் அதிகரித்துள்ளது தெரிய வந்துள்ளது.

கடந்த 2024 மற்றும் 2025 ஆகிய இரண்டு ஆண்டுகளில் மொத்தம் 93,000-க்கும் மேற்பட்ட பெண்கள் காணாமல் போயுள்ளனர். இதில் 18 வயதிற்கு மேற்பட்ட பெண்கள் மற்றும் சிறுமிகளும் அடங்குவர். நாளொன்றுக்கு சராசரியாக 100-க்கும் மேற்பட்ட பெண்கள் மாராட்டியத்தின் பல்வேறு பகுதிகளில் இருந்து காணாமல் போவதாகப் புகார்கள் பதிவாகின்றன. குறிப்பாக மும்பை, புனே, நாக்பூர் மற்றும் தானே போன்ற பெரிய நகரங்களில் இந்த எண்ணிக்கை அதிகமாக உள்ளது. காணாமல் போனவர்களில் கணிசமானோர் போலீசாரால் மீட்கப்பட்டாலும், இன்னும் ஆயிரக்கணக்கான பெண்களின் கதி என்ன என்பது தெரியவில்லை.

பெண்கள் காணாமல் போவதற்குப் பின்னால் பல்வேறு சமூக மற்றும் குற்றவியல் காரணங்கள் இருப்பதாகக் கூறப்படுகிறது: காதல் மற்றும் திருமண ஆசை காட்டி பெண்கள் கடத்தப்படுதல்.  போலி வேலை வாய்ப்புகளை நம்பி வெளிமாநிலங்களுக்குச் செல்லும் பெண்கள் மனிதக் கடத்தல் கும்பலிடம் சிக்குதல். வறுமை மற்றும் குடும்பத் தகராறு காரணமாக வீட்டை விட்டு வெளியேறுதல்.

இந்த விவகாரம் குறித்து மராட்டிய சட்டப்பேரவையில் எதிர்க்கட்சிகள் கடும் கண்டனம் தெரிவித்துள்ளன. பெண்களின் பாதுகாப்பை உறுதி செய்யத் தவறியதாக அரசு மீது விமர்சனங்கள் எழுந்துள்ளன. இதனைத் தொடர்ந்து, காணாமல் போன பெண்களைக் கண்டறிய 'ஆபரேஷன் முஸ்கான்' போன்ற சிறப்புத் தேடுதல் வேட்டைகளைத் தீவிரப்படுத்தவும், கடத்தல் கும்பல்களை ஒடுக்கவும் அம்மாநிலக் காவல்துறைக்கு உத்தரவிடப்பட்டுள்ளது.

பெண்களுக்கு எதிரான குற்றங்களைத் தடுக்க மாநிலம் முழுவதும் சிசிடிவி கண்காணிப்பு மற்றும் விழிப்புணர்வு முகாம்களை அதிகரிக்கவும் திட்டமிடப்பட்டுள்ளது.