பாகிஸ்தானைச் சேர்ந்த தடை செய்யப்பட்ட பயங்கரவாத அமைப்புடன் சமூக ஊடகங்கள் வாயிலாகத் தொடர்பில் இருந்ததாக, உத்தரப் பிரதேசத்தைச் சேர்ந்த சுஹைல் (20) என்ற வாலிபரை கர்நாடக மாநிலம் தவாங்கரேவில்  காவல்துறையினர் கைது செய்துள்ளனர். மத்திய புலனாய்வு அமைப்பான என்.ஐ.ஏ கொடுத்த ரகசிய உளவுத் தகவலின் அடிப்படையில் இந்த விபரீத நடவடிக்கை எடுக்கப்பட்டுள்ளது.

உத்தரப் பிரதேசத்தைச் சேர்ந்த 20 வயதான சுஹைல், கர்நாடகாவின் தவாங்கரே பகுதிக்குக் கூலி வேலை மற்றும் பெயிண்ட் அடிக்கும் தொழிலுக்காக வந்துள்ளார். சாதாரணத் தொழிலாளி போலப் பகலில் நடமாடி வந்த இவரை, மத்திய உளவுத்துறையினர் கடந்த சில நாட்களாகத் தீவிரமாகக் கண்காணித்து வந்தனர்.

சுஹைல் கைது செய்யப்பட்டதைத் தொடர்ந்து, அவரிடமிருந்த மொபைல் போனைப் பறிமுதல் செய்த காவல்துறையினர் அதனைத் தீவிரத் தணிக்கைக்கு உட்படுத்தினர். அதில், பாகிஸ்தானைச் சேர்ந்த பயங்கரவாத அமைப்புகளின் முக்கியப் புள்ளிகளுடன் சுஹைல் சமூக ஊடகங்கள் மூலம் தொடர்ந்து பேசி வந்தது கண்டுபிடிக்கப்பட்டது. மேலும், இந்தியாவில் வன்முறையைத் தூண்டும் வகையிலான பல ஆபத்தான சாட்டிங்குகள் மற்றும் தேச விரோதத் தரவுகள் அவரது போனில் இருந்து கைப்பற்றப்பட்டுள்ளன.

தற்போது கைது செய்யப்பட்டுள்ள சுஹைலிடம், கர்நாடக மாநில போலீசாரும் மத்திய உளவுப்பிரிவினரும் இரகசிய இடத்தில் வைத்துத் தீவிர விசாரணை நடத்தி வருகின்றனர். இவருக்குப் பின்னால் உள்ள சர்வதேசப் பின்னணி என்ன, கர்நாடகாவில் ஏதேனும் அசம்பாவிதங்களுக்குத் திட்டம் தீட்டப்பட்டதா என்ற கோணத்தில் விசாரணை முடுக்கிவிடப்பட்டுள்ளது.

ஏற்கனவே, இதே போன்ற பயங்கரவாத அமைப்புகளுடனான தொடர்பு மற்றும் தேச விரோதச் செயல்பாடுகள் தொடர்பான வழக்கில், கடந்த ஜூன் 4-ஆம் தேதி கர்நாடகாவில் இருவர் கைது செய்யப்பட்டிருந்தனர். அந்தச் சம்பவம் மறைவதற்குள் தற்பொழுது மேலும் ஒரு வாலிபர் என்.ஐ.ஏ உளவுத் தகவலால் கைது செய்யப்பட்டுள்ளது கர்நாடக மற்றும் மத்தியப் பாதுகாப்பு வட்டாரங்களில் பெரும் பரபரப்பை ஏற்படுத்தியுள்ளது.