ஸ்டூடியோவில் பாலியல் சித்ரவதை; பிரபல இசையமைப்பாளர் மீது பாடகி பகீர் புகார்!

தமிழ் சினிமா துறையில் முன்னணி பாடகியாக வலம் வந்த ஸ்வாகதா, பிரபல இசையமைப்பாளர் ஒருவர் மீது சுமத்தியுள்ள பாலியல் குற்றச்சாட்டுகள் தற்போது தமிழகத்தையே உலுக்கி வருகின்றன. கடந்த 8 ஆண்டுகளுக்கு முன்பு பாடத் தொடங்கிய இவர், திடீரென திரையுலகை விட்டு விலகி வீட்டிற்குள்ளேயே முடங்கிக் கிடந்த மர்மம் தற்போது வெளிச்சத்திற்கு வந்துள்ளது. சென்னையில் உள்ள ஒரு புகழ்பெற்ற இசையமைப்பாளரின் ஸ்டூடியோவில் பணியாற்றிய போது, அங்கு நடந்த கொடுமைகளை ஒரு நேர்காணலில் கண்ணீருடன் விவரித்துள்ளார். படத்தில் பாட வாய்ப்பு தருவதாகக் கூறி சம்பளம் தராமல் வேலை வாங்கியதோடு, பாலியல் ரீதியாகவும் அந்த இசையமைப்பாளர் தன்னை மிகவும் துன்புறுத்தியதாக ஸ்வாகதா குற்றம் சாட்டியுள்ளார்.

அந்த இசையமைப்பாளர் ஒரு பெண் பித்தராகச் செயல்பட்டது மட்டுமின்றி, ஸ்டூடியோவிற்கு வரும் சிறுமிகளிடமும் எல்லை மீறி நடந்துகொண்டதாக வரும் தகவல் அதிர்ச்சியைத் தருகிறது. ஸ்டூடியோவில் ரகசியமாகக் கேமராக்களைப் பொருத்தி பெண்களை வீடியோ எடுத்து மிரட்டுவதைத் தொழிலாகவே அவர் கொண்டுள்ளார் எனப் புகாரில் கூறப்பட்டுள்ளது. ஒருகட்டத்தில் இந்த விவகாரம் இசையமைப்பாளரின் மனைவிக்குத் தெரியவந்த போது, தன் மீது பழி சுமத்திவிட்டுத் தற்கொலை நாடகம் ஆடி அவர் தப்பித்ததாகவும் ஸ்வாகதா பகிரங்கமாகத் தெரிவித்துள்ளார். உண்மையை வெளியே சொன்னால் ரகசிய வீடியோக்களை இணையதளத்தில் வெளியிட்டு விடுவேன் என அந்த நபர் மிரட்டியதே தான் இத்தனை காலம் அமைதியாக இருந்ததற்குக் காரணம் என அவர் விளக்கம் அளித்துள்ளார்.

தற்போது துணிச்சலுடன் வெளியே வந்துள்ள ஸ்வாகதா, அந்த இசையமைப்பாளரின் பெயரை ரகசியமாக வைத்துள்ளாரே தவிர ஆதாரங்களுடன் சட்ட ரீதியாகப் புகார் அளிக்கத் தயாராகி வருகிறார். இந்த விவகாரம் சமூக வலைதளங்களில் காட்டுத்தீ போலப் பரவி வரும் நிலையில், அந்த மோசமான நபர் யார் என்பதைத் தெரிந்துகொள்ள திரைத்துறையினர் ஆர்வமாக உள்ளனர். சினிமாவில் நுழையும் பெண்களுக்குப் பாதுகாப்பு இல்லாத சூழல் நிலவுவதும், திறமையான கலைஞர்கள் இது போன்ற நபர்களால் முடக்கப்படுவதும் வேதனையான விஷயமாகப் பார்க்கப்படுகிறது. காவல்துறை உரிய நடவடிக்கை எடுத்தால் மட்டுமே அந்த இசையமைப்பாளரின் முகத்திரை கிழிக்கப்பட்டு, பாதிக்கப்பட்ட பெண்களுக்கு உண்மையான நீதி கிடைக்கும் என்பதே அனைவரின் எதிர்பார்ப்பாகும்.