இந்தியத் திரையுலகின் மாபெரும் இசைப் பொக்கிஷமாக விளங்கிய பழம்பெரும் பாடகி எஸ். ஜானகி அம்மா (88) காலமானதைத் தொடர்ந்து, இந்தியத் துணை ஜனாதிபதி, மத்திய அமைச்சர்கள், தமிழகத்தின் முக்கிய அரசியல் கட்சித் தலைவர்கள் மற்றும் உச்ச நட்சத்திரங்கள் தங்களது நெஞ்சார்ந்த இரங்கல்களைத் தெரிவித்து வருகின்றனர்.

பாடகி ஜானகி அம்மாவின் மறைவுக்குத் துணை ஜனாதிபதி சி.பி.ராதாகிருஷ்ணன் விடுத்துள்ள இரங்கல் செய்தியில், "புகழ்பெற்ற பின்னணி பாடகி எஸ்.ஜானகி அவர்களின் மறைவுச் செய்தி அறிந்து ஆழ்ந்த வருத்தம் அடைகிறேன். அவரது அசாத்தியமான காந்தக் குரல் இந்திய இசையை வளப்படுத்தி, தலைமுறைகள் கடந்து எண்ணற்ற இதயங்களைத் தொட்டுள்ளது. தமிழ், தெலுங்கு, மலையாளம், கன்னடம், இந்தி எனப் பல மொழிகளில் ஆயிரக்கணக்கான பாடல்களால் 6 தசாப்தங்களுக்கும் மேலாக அவர் ரசிகர்களைக் கட்டிப்போட்டிருந்தார்.

பாரம்பரிய இசை, பக்திப் பாடல்கள், நாட்டுப்புறப் பாடல்கள் என அனைத்திலும் அவர் சமமான தேர்ச்சியை வெளிப்படுத்தியவர். ஜானகியின் மறைவு இசை உலகத்திற்கும், நமது தேசத்தின் கலைப் பாரம்பரியத்திற்கும் ஈடுசெய்ய முடியாத பேரிழப்பாகும். அவரது ஆன்மா சாந்தியடையட்டும்."

மத்திய இணை அமைச்சர் எல்.முருகன் வெளியிட்டுள்ள இரங்கல் செய்தியில், "பழம்பெரும் பின்னணி பாடகி எஸ்.ஜானகி அவர்களின் மறைவு மிகுந்த வேதனையளிக்கிறது. பல மொழிகளில் பல்லாயிரக்கணக்கான பாடல்களைப் பாடி, தனது இனிமையான குரலாலும், உணர்வுபூர்வமான இசை வெளிப்பாட்டாலும் பல தலைமுறை மக்களின் இதயங்களில் நீங்கா இடம்பிடித்தவர் அவர். இந்திய இசை உலகிற்கு அவர் ஆற்றிய பங்கு வரலாற்றில் என்றென்றும் நிலைத்திருக்கும்" என்று புகழாரம் சூட்டியுள்ளார்.

ஜானகி அம்மாவின் மறைவு ஒட்டுமொத்த தமிழகத்தையும் சோகத்தில் ஆழ்த்தியுள்ள நிலையில், பல்வேறு அரசியல் தலைவர்களும் தங்களது இரங்கல்களைத் தெரிவித்துள்ளனர். த.மா.கா. தலைவர் ஜி.கே.வாசன், அ.ம.மு.க. பொதுச்செயலாளர் டி.டி.வி.தினகரன், இந்திய கம்யூனிஸ்டு கட்சியின் மாநில செயலாளர் வீரபாண்டியன், சமத்துவ மக்கள் கழக தலைவர் எர்ணாவூர் நாராயணன், தமிழ்நாடு நாடார் சங்க தலைவர் முத்து ரமேஷ் உள்ளிட்ட பல தலைவர்கள் தங்களது ஆழ்ந்த இரங்கலைத் தெரிவித்துள்ளனர்.

திரையுலகில் பல தசாப்தங்களாகத் தனது குரலால் கோலோச்சிய ஜானகி அம்மாவின் மறைவுக்குத் திரைத்துறையினர் கண்ணீர் அஞ்சலி செலுத்தி வருகின்றனர். முன்னணி நடிகர்களான ரஜினிகாந்த், கமல்ஹாசன், நடிகை சிம்ரன், இசையமைப்பாளர் அனிருத், இயக்குநர் நாஞ்சில் பி.சி.அன்பழகன் மற்றும் தமிழ் திரைப்பட தயாரிப்பாளர்கள் சங்க தலைவர் தமிழ் குமரன் உள்ளிட்ட ஏராளமான திரையுலகப் பிரமுகர்கள் தங்களது இரங்கல் செய்திகளைப் பகிர்ந்துள்ளனர்.

மைசூருவில் உள்ள மகாராஜா கல்லூரி மைதானத்தில் இன்று காலை முதலே ஜானகி அம்மாவின் உடல் பொதுமக்கள் மற்றும் லட்சக்கணக்கான ரசிகர்களின் அஞ்சலிக்காக வைக்கப்பட்டுள்ளது. இதனைத் தொடர்ந்து, இன்று பிற்பகல் 3 மணி அளவில் அவரது இறுதி ஊர்வலம் தொடங்குகிறது. அங்கிருந்து உடல் ஊர்வலமாகக் கொண்டு செல்லப்பட்டு, கனியனகுந்தி என்ற இடத்தில் முறைப்படியான சடங்குகளுடன், கர்நாடக அரசின் முழு அரசு மரியாதையுடன் அவரது உடல் தகனம் செய்யப்படவுள்ளது.