பசிபிக் பெருங்கடலில் போதைப்பொருள் கடத்தல் படகு மீது அமெரிக்கா திடீர் தாக்குதல்... இருவர் உடல்சிதறிப் பலி!

மத்திய அமெரிக்க நாடுகளிலிருந்து அமெரிக்காவிற்குள் சட்டவிரோதமாகக் கடத்தப்படும் போதைப்பொருட்களைத் தடுக்கும் நோக்கில், பசிபிக் பெருங்கடலில் அமெரிக்க ராணுவம் தனது வரலாறுகாணாத அதிரடி வேட்டையைத் தீவிரப்படுத்தியுள்ளது. இதன் ஒரு பகுதியாக, கிழக்கு பசிபிக் பெருங்கடல் பகுதியில் சந்தேகத்திற்கிடமான முறையில் அதிவேகமாகச் சென்று கொண்டிருந்த போதைப்பொருள் கடத்தல் படகு ஒன்றைக் குறிவைத்து, அமெரிக்காவின் தெற்கு ராணுவ கட்டளையகம் (US Southern Command) நேற்று ஒரு பயங்கர வான்வழித் தாக்குதலை நடத்தியுள்ளது. நடுவானில் இருந்து பாய்ந்து வந்த ஏவுகணை தாக்கியதில், அந்தப் படகு கடலிலேயே வெடித்துச் சிதறியதுடன், அதில் பயணம் செய்த இரண்டு கடத்தல்காரர்கள் சம்பவ இடத்திலேயே உடல்சிதறிப் பரிதாபமாகப் பலியாயினர்.

அமெரிக்க ராணுவத்தால் நடத்தப்பட்ட இந்த அதிரடித் தாக்குதலின் பதைபதைக்க வைக்கும் கருப்பு-வெள்ளைக் காட்சிகள், தற்போது அந்நாட்டின் பாதுகாப்புத் துறையால் அதிகாரப்பூர்வமாகச் சமூக வலைதளங்களில் வெளியிடப்பட்டு உலகளவில் பெரும் அதிர்ச்சியை ஏற்படுத்தியுள்ளது. கடலில் மிதந்து கொண்டிருந்த அந்தப் படகு, ஒரு நொடியில் பயங்கர வெடிச்சத்தத்துடன் தீப்பிழம்பாக மாறி, வானுயரப் புகைமூட்டத்துடன் கடலுக்குள் மூழ்கும் காட்சிகள் அதில் பதிவாகியுள்ளன. இதற்கு முந்தைய நாள் செவ்வாய்க்கிழமையும் இதேபோன்றதொரு தாக்குதலில் ஒருவர் கொல்லப்பட்ட நிலையில், தற்போதைய அதிபர் டொனால்ட் டிரம்ப் நிர்வாகத்தின் இந்த அதிரடி "மிலிட்டரி ஆப்பரேஷன்" காரணமாக, கடந்த செப்டம்பர் மாதம் முதல் இதுவரை போதைப்பொருள் கடத்தல் படகுகளில் பயணித்த சுமார் 196 பேர் நடுக் கடலிலேயே சுட்டுக்கொல்லப்பட்டுள்ளனர் என்பது குறிப்பிடத்தக்கது.

"அமெரிக்கச் சமூகங்களைச் சீரழிக்கும் லத்தீன் அமெரிக்கப் போதைப்பொருள் கார்டெல்களுக்கு (Cartels) எதிராக நாங்கள் அதிகாரப்பூர்வமாகப் போர்ப் பிரகடனம் செய்துள்ளோம்" என்று டிரம்ப் நிர்வாகம் இந்தத் தாக்குதல்களைத் தொடர்ந்து நியாயப்படுத்தி வருகிறது. இருப்பினும், அமெரிக்க ராணுவம் தாக்கியழித்த படகுகளில் உண்மையில் போதைப்பொருட்கள் இருந்தனவா என்பதற்கான எவ்வித உறுதியான ஆதாரங்களையும் இதுவரை அவர்கள் பகிரங்கமாக வெளியிடவில்லை. இதனால், சர்வதேசச் சட்டங்களை மீறி இத்தகைய கொடூரமான நடுக்கடல் படுகொலைகளை அமெரிக்கா அரங்கேற்றி வருவதாக மனித உரிமை அமைப்புகளும், எதிர்க்கட்சிகளும் கடுமையான குற்றச்சாட்டுகளை முன்வைத்து வரும் வேளையில், இந்த விவகாரம் தற்போது உலகளவில் மிகப்பெரிய மனித உரிமை மற்றும் சர்வதேசப் பாதுகாப்பு விவாதத்தை வெடிக்கச் செய்துள்ளது