நடுக்கடலில் இலங்கை கடற்படை அட்டகாசம்... மீன்பிடிக்க விடாமல் ராமேஸ்வரம் மீனவர்கள் விரட்டியடிப்பு!

ராமேஸ்வரம் விசைப்படகு துறைமுகப் பகுதியில் நிலவி வந்த பலத்த காற்றின் வேகம் மற்றும் கடல் சீற்றம் தணிந்ததைத் தொடர்ந்து 4 நாட்களுக்குப் பிறகு நேற்று முன்தினம் கடலுக்குச் செல்ல மீனவர்களுக்கு அனுமதி வழங்கப்பட்டது. இதனைத் தொடர்ந்து வாழ்வாதாரத்தைத் தேடி 400 க்கும் மேற்பட்ட விசைப்படகுகளில் சுமார் 2,000 க்கும் அதிகமான ராமேஸ்வரம் மீனவர்கள் மிகுந்த ஆர்வத்துடன் கடலுக்குள் மீன்பிடிக்கச் சென்றுள்ளனர். அவர்கள் நடுக்கடலில் தங்களுக்குரிய எல்லைப் பகுதியில் வலைகளை விரித்து மீன்பிடித்துக் கொண்டிருந்த போது அங்கு எதிர்பாராத விதமாகப் பெரும் பரபரப்பு கிளம்பியது.

அப்போது 3 ரோந்து கப்பல்களில் அந்தப் பகுதிக்கு வந்த இலங்கை கடற்படையினர், இந்திய மீனவர்களை மீன்பிடிக்க விடாமல் தடுத்துத் தங்களின் ஆயுதங்களைக் காட்டி மிரட்டி நடுக்கடலில் கொடூரமாக விரட்டியடித்துள்ளனர். இலங்கை கடற்படையினரின் இந்தத் திடீர் அத்துமீறல் மற்றும் விரட்டியடிப்பு நடவடிக்கையால் கடலில் பெரும் பதற்றமும் அச்சமும் நிலவியது. இதனால் உயிருக்கு அஞ்சிய தமிழக மீனவர்கள் தங்களின் மீன்பிடிப் பணிகளைப் பாதியிலேயே அவசரமாக நிறுத்திவிட்டு தனுஷ்கோடி மற்றும் பாம்பன் இடைப்பட்ட பாதுகாப்பான கடல் பகுதிக்குத் தப்பி வந்தனர்.

அங்கு அரைகுறையாக மீன்பிடித்துவிட்டுப் பெரும் நஷ்டத்துடன் நேற்று காலை ராமேஸ்வரம் கடற்கரைக்கு மீனவர்கள் சோகத்துடன் கரை திரும்பினர். லட்சக்கணக்கில் டீசல் மற்றும் வலைகளுக்குப் பணம் செலவழித்துக் கடலுக்குச் சென்ற தங்களுக்கு இச்சம்பவத்தால் மாபெரும் நஷ்டம் ஏற்பட்டுள்ளதாக விசைப்படகு உரிமையாளர்கள் கவலை தெரிவித்துள்ளனர். நடுக்கடலில் தொடர்ந்து அரங்கேறி வரும் இலங்கை கடற்படையினரின் இந்த வாழ்வாதாரத் தாக்குதலுக்கு நிரந்தர முற்றுப்புள்ளி வைக்க மத்திய, மாநில அரசுகள் உரிய நடவடிக்கை எடுக்க வேண்டும் என மீனவ அமைப்புகள் கோரிக்கை விடுத்துள்ளன.