"மக்கள் நலன் சார்ந்த ஆலோசனைகளை வழங்கினேன்"...  ஸ்டாலின் எக்ஸ் தளத்தில் பதிவு!

தமிழக முதலமைச்சராகப் பொறுப்பேற்றுள்ள ஜோசப் விஜய், இன்று (மே 11) மூத்த அரசியல் தலைவர்களை நேரில் சந்தித்து வாழ்த்துப் பெற்று வருகிறார். அதன் ஒரு பகுதியாக, சென்னை ஆழ்வார்பேட்டையில் உள்ள இல்லத்தில் திமுக தலைவர் மு.க.ஸ்டாலினை அவர் நேரில் சந்தித்துப் பேசினார். இந்தச் சந்திப்பின் போது எடுக்கப்பட்ட புகைப்படங்கள் இணையத்தில் வெளியாகிப் பரபரப்பை ஏற்படுத்திய நிலையில், மு.க.ஸ்டாலின் தனது அதிகாரப்பூர்வ எக்ஸ் (X) தளத்தில் இது குறித்து ஒரு பதிவை வெளியிட்டுள்ளார்.

அந்தப் பதிவில், முதலமைச்சர் விஜய்க்குத் தனது மனமார்ந்த வாழ்த்துகளைத் தெரிவித்துக் கொண்டதாக மு.க.ஸ்டாலின் குறிப்பிட்டுள்ளார். மேலும், "தமிழக மக்களின் நலன் சார்ந்த பல்வேறு முக்கிய ஆலோசனைகளையும், அன்பான வாழ்த்துகளையும் தம்பி விஜய்க்கு வழங்கினேன்" என அவர் நெகிழ்ச்சியுடன் பதிவிட்டுள்ளார். அரசியல் ரீதியாக இருவரும் எதிர் துருவங்களாக இருந்தாலும், ஒருவருக்கொருவர் காட்டிய இந்த பரஸ்பர மரியாதை தமிழக அரசியலில் ஆரோக்கியமான மாற்றமாகப் பார்க்கப்படுகிறது.

முன்னதாக, முதலமைச்சர் விஜயை வீட்டின் வாசலுக்கே வந்து எதிர்க்கட்சித் தலைவர் உதயநிதி ஸ்டாலின் கட்டிப்பிடித்து வரவேற்றார். அதனைத் தொடர்ந்து நடைபெற்ற இந்தச் சந்திப்பு சுமார் 30 நிமிடங்கள் நீடித்தது. தமிழகத்தின் வளர்ச்சித் திட்டங்கள் மற்றும் மாநில உரிமைகளை மீட்டெடுப்பது குறித்து இரு தலைவர்களும் விவாதித்ததாகக் கூறப்படுகிறது. மு.க.ஸ்டாலினின் இந்த வாழ்த்துப் பதிவு தற்போது சமூக வலைதளங்களில் திமுக மற்றும் தவெக தொண்டர்களால் அதிகளவில் பகிரப்பட்டு வருகிறது.