தமிழக சட்டமன்றத் தேர்தல் இன்று நிறைவடைந்துள்ள நிலையில், மாநிலத்தின் மிக முக்கியமான விஐபி தொகுதிகளில் கடந்த 2021 தேர்தலை விட இந்த முறை வாக்குப்பதிவு எண்ணிக்கை கணிசமாக அதிகரித்துள்ளது. குறிப்பாக, இளைஞர்கள் மற்றும் முதல்முறை வாக்காளர்களின் வருகை பல தொகுதிகளில் புதிய வரலாற்றைப் படைத்துள்ளது.

கொளத்தூர்: முதலமைச்சர் மு.க. ஸ்டாலின் போட்டியிடும் இந்தத் தொகுதியில், கடந்த தேர்தலை விட இந்த முறை கூடுதலாக 80,500 வாக்குகள் பதிவாகி அனைவரையும் வியப்பில் ஆழ்த்தியுள்ளது. எதிர்க்கட்சித் தலைவர் எடப்பாடி பழனிசாமியின் சொந்தத் தொகுதியான எடப்பாடியில், கடந்த முறையை விட 7,171 வாக்குகள் அதிகரித்துள்ளன.

அரசியல் களத்தில் புதிய வரவாக நுழைந்துள்ள தமிழக வெற்றிக் கழகத் (தவெக) தலைவர் விஜய் போட்டியிடும் பெரம்பூர் தொகுதியில் 3,000 வாக்குகள் கூடுதலாகப் பதிவாகியுள்ளன. திருச்சி கிழக்கு தொகுதியில் கடந்த தேர்தலை விட 8,300 வாக்குகள் அதிகமாகப் பதிவாகியுள்ளது குறிப்பிடத்தக்கது.

தமிழகம் முழுவதும் இன்று மாலை 5 மணி நிலவரப்படி 82.24% வாக்குகள் பதிவாகியிருந்த நிலையில், இறுதி நிலவரப்படி இந்த எண்ணிக்கை 84.93% ஆக உயர்ந்து புதிய சாதனை படைத்துள்ளது. இது 2021 தேர்தலின் வாக்குப்பதிவு சதவீதத்தை (73.63%) விட சுமார் 11.3% அதிகமாகும்.

இந்த அதீத வாக்குப்பதிவு தமிழக அரசியலில் மிகப்பெரிய மாற்றத்தை ஏற்படுத்துமா அல்லது தற்போதைய நிலையே நீடிக்குமா என்பது வரும் மே 4-ஆம் தேதி வாக்கு எண்ணிக்கையின் போது தெரிந்துவிடும். தற்போது மின்னணு வாக்குப்பதிவு இயந்திரங்கள் அனைத்தும் 62 மையங்களில் 3 அடுக்கு பாதுகாப்புடன் வைக்கப்பட்டுள்ளன.