தமிழக அமைச்சரவை விரிவாக்கத்தில், அதிமுகவின் அதிருப்தி எம்.எல்.ஏ-க்களைச் சேர்க்க முதலமைச்சர் விஜய் திட்டமிட்டுள்ளதால், த.வெ.க அரசுக்கு அளித்து வரும் ஆதரவை வாபஸ் பெறப் போவதாக மார்க்சிஸ்ட் கம்யூனிஸ்ட் (சிபிஎம்) கட்சி கடுமையான எச்சரிக்கை விடுத்துள்ளது. இதே முடிவை சிபிஐ, விசிக மற்றும் ஐயூஎம்எல் ஆகிய கட்சிகளும் எடுக்க வாய்ப்புள்ளதால், தமிழக அரசியலில் பெரும் பரபரப்பு ஏற்பட்டுள்ளது.

கடந்த மே 10-ம் தேதி தமிழகத்தின் புதிய முதலமைச்சராகத் த.வெ.க தலைவர் விஜய் பதவியேற்றார். சட்டசபையில் ஆட்சி அமைக்க 118 எம்.எல்.ஏ-க்களின் ஆதரவு தேவை என்ற நிலையில், த.வெ.க கூட்டணிக்கு மொத்தம் 144 எம்.எல்.ஏ-க்களின் பலம் உள்ளது.

இதில் த.வெ.க-விற்கு 106 எம்.எல்.ஏ-க்களும், காங்கிரஸ் 5, சிபிஐ 2, சிபிஎம் 2, விசிக 2, ஐயூஎம்எல் 2 மற்றும் எடப்பாடி பழனிசாமி தலைமையிலான அதிமுகவிலிருந்து பிரிந்து வந்த 25 அதிருப்தி எம்.எல்.ஏ-க்களும் முதலமைச்சர் விஜய்க்கு ஆதரவு அளித்து வருகின்றனர். இந்நிலையில், நாளை நடைபெறவுள்ள அமைச்சரவை விரிவாக்கத்தில், எஸ்பி வேலுமணி, சி.வி.சண்முகம் உள்ளிட்ட அதிமுக அதிருப்தி எம்.எல்.ஏ-க்களுக்கு அமைச்சர் பதவி வழங்க முதலமைச்சர் விஜய் முடிவு செய்துள்ளதாகத் தகவல்கள் வெளியாகின.

அதிமுக அதிருப்தி குழுவினரை அமைச்சரவையில் சேர்ப்பதற்குத் த.வெ.க கூட்டணியில் உள்ள இடதுசாரிகள் மற்றும் விசிக தரப்பில் கடும் எதிர்ப்பு கிளம்பியுள்ளது. "அதிமுக அதிருப்தியாளர்களை அமைச்சரவையில் சேர்த்தால், அரசுக்கு அளித்து வரும் ஆதரவை வாபஸ் பெற நேரிடும்" என சிபிஎம் கட்சி பகிரங்கமாக எச்சரித்துள்ளது.

இடதுசாரிகளின் இந்த அதிரடி முடிவைத் தொடர்ந்து, சிபிஐ, விடுதலைச் சிறுத்தைகள் கட்சி (விசிக) மற்றும் ஐயூஎம்எல் ஆகிய 4 கட்சிகளும் த.வெ.க அரசுக்கு அளித்து வரும் தங்களின் ஆதரவை ஒட்டுமொத்தமாக விலக்கிக் கொள்ளத் தீவிரமாக ஆலோசித்து வருகின்றன. இதனால் த.வெ.க கூட்டணி உடையும் நிலைக்குத் தள்ளப்பட்டுள்ளது.

சட்டமன்றத்தில் தற்போதைய பலத்தின்படி, இந்த 4 கட்சிகளும் (சிபிஎம் 2, சிபிஐ 2, விசிக 2, ஐயூஎம்எல் 2) தங்களின் ஆதரவை வாபஸ் பெற்றால், த.வெ.க அரசுக்கு 8 எம்.எல்.ஏ-க்களின் ஆதரவு குறையும். இதன் மூலம் த.வெ.க கூட்டணியின் பலம் 144-லிருந்து 136 ஆகக் குறையும்.

இருப்பினும், ஆட்சி அமைப்பதற்கான பெரும்பான்மைக்கு 118 இடங்கள் மட்டுமே போதும் என்பதால், அமைச்சரவையில் இணையச் சம்மதித்துள்ள காங்கிரஸின் 5 எம்.எல்.ஏ-க்கள் மற்றும் அதிமுக பிளவு குழுவின் 25 எம்.எல்.ஏ-க்களின் ஆதரவோடு முதலமைச்சர் விஜய் தலைமையிலான த.வெ.க அரசு எவ்வித முடக்கமும் இன்றி தொடர்ந்து நீடிக்கும் என்றே அரசியல் விமர்சகர்கள் கருதுகின்றனர். இருப்பினும், புதிய அரசு அமைந்த சில நாட்களிலேயே கூட்டணிக்குள் ஏற்பட்டுள்ள இந்த விரிசல் கோட்டையில் பெரும் பரபரப்பை ஏற்படுத்தியுள்ளது.