சினிமாவில் சோகம்... பிரபல தொழில்நுட்ப வல்லுநர் பி. சுதீர் புற்றுநோயால் காலமானார்!

மலையாள திரைப்படத் துறையைச் சேர்ந்த பிரபல தொழில்நுட்ப வல்லுநர் பி. சுதீர் தனது எழுபதாவது வயதில் புற்றுநோய் காரணமாகக் காலமானார். அடையாறு திரைப்படக் கல்லூரியில் முறையான கல்வி பயின்ற இவர், ஆரம்பத்தில் மெர்ரி லேண்ட் ஸ்டுடியோவில் தனது பணியைத் தொடங்கினார்.

அதன் பின்னர் புகழ்பெற்ற இயக்குநர் அடூர் கோபாலகிருஷ்ணன் தலைமையிலான சித்ராலேகா ஸ்டுடியோவில் இவர் தனது சேவையைத் தொடர்ந்தார். சித்ராஞ்சலி ஸ்டுடியோவில் ஆய்வகத் தொழில்நுட்ப வல்லுநர், ஆய்வகத் தலைவர் மற்றும் வண்ண ஆலோசகர் போன்ற பல முக்கியப் பொறுப்புகளை வகித்துள்ளார்.

கருப்பு-வெள்ளை காலம் முதல் நவீன டிஜிட்டல் காலம் வரை மலையாளத் திரையுலகில் ஐநூறுக்கும் மேற்பட்ட திரைப்படங்களுக்கு இவர் பங்களித்துள்ளார். இவரின் மறைவு மலையாளத் திரைப்படத் துறையினர் மற்றும் தொழில்நுட்ப வல்லுநர்கள் மத்தியில் பெரும் சோகத்தை ஏற்படுத்தியுள்ளது.