டெல்லியில் உள்ள பரபரப்பான மேம்பாலம் ஒன்றின் உச்சியில் ஏறித் தற்கொலைக்கு முயன்ற இளைஞர் ஒருவரை, டெல்லி போலீஸ் சப்-இன்ஸ்பெக்டர் அனில் சர்மா தனது அசாத்திய சமயோசித புத்தியாலும், கனிவான அணுகுமுறையாலும் சாதுரியமாகக் காப்பாற்றிய நெகிழ்ச்சியான சம்பவம் அரங்கேறியுள்ளது.

டெல்லி மகிபால்பூர் பகுதியில் உள்ள மேம்பாலத்தின் மேல் இளைஞர் ஒருவர் தற்கொலை செய்து கொள்ளும் நோக்கில் ஆபத்தான முறையில் நின்று கொண்டிருப்பதாக டெல்லி காவல்துறைக்கு அவசரத் தகவல் கிடைத்துள்ளது. சம்பவ இடத்திற்கு விரைந்து வந்த சப்-இன்ஸ்பெக்டர் அனில் சர்மா, அந்த இளைஞர் கடுமையான மன உளைச்சலில் இருப்பதையும், சற்று அச்சுறுத்தினாலும் கீழே குதித்து விடுவார் என்பதையும் உணர்ந்தார்.

இதனால், அவசரப்பட்டு அவரைப் பிடிக்க முயலாமல், தூரத்திலிருந்தபடியே அந்த இளைஞரிடம் மிகவும் பாசத்தோடும், கனிவோடும் பேசத் தொடங்கினார்.

இளைஞரை அமைதிப்படுத்துவதற்காக முதலில் குடிக்கத் தண்ணீர் கொடுத்து உதவிய அனில் சர்மா, தொடர்ந்து அவரது மனக்குறைகளைக் கேட்டறிந்தார். பின்னர், இளைஞரின் கவனத்தை ஆபத்தான சிந்தனையிலிருந்து திசைதிருப்பும் நோக்கில், அவரிடம் பேசுவதற்காகத் தனது சொந்த மொபைல் போனைக் கொடுத்துள்ளார்.

காவலர் காட்டிய அந்த மனிதநேயம் மற்றும் கனிவான பேச்சால் உருகிய அந்த இளைஞர், மொபைல் போனை வாங்குவதற்காகத் தனது கவனத்தைச் சற்றுத் திசைதிருப்பியுள்ளார்.

இளைஞரின் கவனம் சிதறிய அந்தச் சரியான நொடியை நொடிப் பொழுதில் பயன்படுத்திய சப்-இன்ஸ்பெக்டர் அனில் சர்மா, பாய்ந்து சென்று அந்த இளைஞரைப் பாதுகாப்பாகப் பிடித்து உள்நோக்கி இழுத்தார். இதனால் அந்த இளைஞரின் உயிர் நூலிழப்பில் காப்பாற்றப்பட்டது.

காவலர் அனில் சர்மா தனது உயிரையும் பொருட்படுத்தாமல் அந்த இளைஞரைச் சாதுரியமாக மீட்ட இந்த நெகிழ்ச்சியான சம்பவத்தின் வீடியோ சமூக வலைதளங்களில் வெளியாகி மிக வேகமாக வைரலாகி வருகிறது. இக்கட்டான சூழ்நிலையிலும் பொறுமையைக் கடைப்பிடித்து, ஒரு விலைமதிப்பற்ற உயிரைக் காப்பாற்றிய டெல்லி போலீஸ் சப்-இன்ஸ்பெக்டருக்கு இணையவாசிகள் மற்றும் பொதுமக்கள் தங்களது பாராட்டுகளைக் குவித்து வருகின்றனர்.