உலகளவில் அதிகரித்து வரும் புவி வெப்பமயமாதல் மற்றும் தீவிர எல் நினோ காலநிலை மாற்றங்கள் காரணமாக, ஐரோப்பிய கண்டத்தில் முன்னெப்போதும் இல்லாத வகையில் வீசிய கடுமையான வெப்ப அலைக்கு பிரான்ஸ், பெல்ஜியம் மற்றும் நெதர்லாந்து ஆகிய நாடுகளில் மட்டும் 3,700-க்கும் மேற்பட்டோர் பரிதாபமாகவிக் உயிரிழந்துள்ளனர். இந்த அதீத வெயிலின் தாக்கம் ஐரோப்பிய நாடுகளின் ஒட்டுமொத்தப் பொதுக் கட்டமைப்பையும் முடக்கியுள்ளது.

ஐரோப்பிய கண்டத்தில் கடந்த ஜூன் 20-ஆம் தேதி முதல் ஜூன் 28-ஆம் தேதி வரையிலான காலகட்டத்தில் வரலாறு காணாத வகையில் வெயில் வாட்டி வதைத்தது. இந்த 8 நாட்களில் ஏற்பட்ட பாதிப்புகள் குறித்த அதிகாரப்பூர்வ விபரங்கள் வெளியிடப்பட்டுள்ளது. 

மின் தட்டுப்பாடு மற்றும் உள்கட்டமைப்பு பாதிப்பு: அதீத வெப்பத்தின் காரணமாக வீடுகள் மற்றும் வணிக வளாகங்களில் குளிரூட்டும் சாதனங்களின் பயன்பாடு அதிகரித்ததால், மின்சாரத் தேவை வரலாறு காணாத அளவுக்கு உயர்ந்தது. அதே வேளையில், மின் உற்பத்தி உள்கட்டமைப்புகள் அதிக வெப்பத்தால் சேதமடைந்து கடுமையான மின் தட்டுப்பாடு ஏற்பட்டது.

கடுமையான வெயில் காரணமாகச் சாலைகளின் தார் உருகியதும், ரயில் தண்டவாளங்கள் பல இடங்களில் வெப்பத்தின் உக்கிரத்தால் வளைந்து சேதமடைந்ததும் போக்குவரத்துத் துறையைப் பெரிதும் பாதித்தது. வெப்ப பாதிப்பால் மருத்துவமனைகளில் நோயாளிகளின் வரத்து பல மடங்கு அதிகரித்தது. தலைநகர் பாரிஸ் உள்ளிட்ட பல நகரங்களில் உள்ள பிணவறைகள் முழுமையாக நிரம்பியதால், சடலங்களைச் சேமித்து வைப்பதில் மகா தட்டுப்பாடு ஏற்பட்டுள்ளதாகத் தகவல்கள் வெளியாகியுள்ளன.

வெப்ப அலையின் கொடூரத் தாக்குதலுக்குப் பிரான்ஸ் நாடுதான் மிக மோசமான பாதிப்புகளைச் சந்தித்துள்ளது. நாடுகள் வாரியாகப் பதிவாகியுள்ள அதிகாரப்பூர்வ விவரங்களின்படி, இந்த வெப்ப அலையால் மிக மோசமாகப் பாதிக்கப்பட்டுள்ள பிரான்சில் மட்டும் 2,025 பேர் உயிரிழந்துள்ளதாக அந்நாட்டுச் சுகாதாரத் துறை தெரிவித்துள்ளது. பலியானவர்களில் 45 வயதிற்கு மேற்பட்டவர்கள் மற்றும் வீடுகளில் தனியாக வசித்து வந்தவர்களே அதிகம் எனத் தெரியவந்துள்ளது.

பிரான்சுக்கு அடுத்தபடியாகப் பெல்ஜியத்தில் 1,200-க்கும் மேற்பட்டோர் வெயிலின் தாக்கம் தாங்காமல் உயிரிழந்துள்ளனர். இவர்களில் 85 வயதைக் கடந்த முதியவர்கள் 530 பேரும், 65 வயதிற்குட்பட்டவர்கள் 180 பேரும் அடங்குவர். நெதர்லாந்திலும் வெப்பத்தின் கோரத்தாண்டவத்திற்கு 480 பேர் பலியாகியுள்ளனர். இவர்களில் பெரும்பாலானோர் 80 வயதைக் கடந்த முதியவர்கள் என்பது குறிப்பிடத்தக்கது.

தற்போது வெளியிடப்பட்டுள்ள இந்த உயிரிழப்புப் புள்ளிவிபரங்கள் அனைத்தும் முதற்கட்டத் தரவுகள் மட்டுமே என்றும், முழுமையான கணக்கெடுப்பு நடத்தப்படும் போது இந்த எண்ணிக்கை இன்னும் பல மடங்கு உயரக்கூடும் என்றும் பிரான்ஸ் சுகாதாரத் துறை அமைச்சர் ஸ்டெபானி ரிஸ்ட்  எச்சரித்துள்ளார். சுற்றுச்சூழல் விஞ்ஞானிகள் மற்றும் சர்வதேசப் பருவநிலை நிபுணர்கள் இந்தத் திடீர் வெப்ப அலை குறித்துப் பின்வருமாறு அச்சம் தெரிவித்துள்ளனர்.

மனிதர்களின் தொடர் சுற்றுச்சூழல் அத்துமீறல்களால் இயற்கையில் ஏற்பட்டுள்ள கார்பன் சமநிலையின்மையே, வழக்கமான கோடைகால வெயிலைக் கூட மனித உயிர்களைக் குடிவாங்கும் உக்கிரமான வெப்ப அலையாக மாற்றியுள்ளது. ஐரோப்பாவின் 410 மில்லியனுக்கும் அதிகமான மக்கள் இந்த ஜூன் மாதத்தில் 35°C முதல் 44°C வரையிலான கொடிய வெப்பநிலையை எதிர்கொண்டுள்ளனர் என்பது குறிப்பிடத்தக்கது.