கூகுளின் தாய் நிறுவனமான ஆல்பாபெட், சுந்தர் பிச்சைக்கு அடுத்த மூன்று ஆண்டுகளுக்கு (2026-2028) வழங்கப்பட வேண்டிய புதிய ஊதியத் தொகுப்பை  வெளியிட்டுள்ளது. இதன்படி, அவரது மொத்த ஊதியம் சுமார் 692 மில்லியன் டாலர்கள் (இந்திய மதிப்பில் சுமார் ₹6,361 கோடி) வரை இருக்கலாம் எனத் தெரிவிக்கப்பட்டுள்ளது. இது நேரடியாக மாதச் சம்பளமாக மட்டும் வழங்கப்படுவதில்லை. இந்த ₹6,361 கோடி என்பது பல்வேறு பிரிவுகளாகப் பிரிக்கப்பட்டுள்ளது:

இவரது ஆண்டு அடிப்படை சம்பளம் 2 மில்லியன் டாலர்கள் (சுமார் ₹18 கோடி) என்பதில் மாற்றம் இல்லை. ஊதியத்தின் பெரும்பகுதி (சுமார் 126 மில்லியன் டாலர்) நிறுவனத்தின் செயல்திறன் சார்ந்த பங்குகளாக வழங்கப்படும். ஆல்பாபெட் நிறுவனத்தின் பங்குகள் சந்தையில் சிறப்பாகச் செயல்பட்டால், இந்தத் தொகை 252 மில்லியன் டாலர் வரை அதிகரிக்க வாய்ப்புள்ளது.

கூகுளின் துணை நிறுவனங்களான வேமோ மற்றும் விங் ஆகியவற்றின் வளர்ச்சியின் அடிப்படையில் சுமார் 350 மில்லியன் டாலர் மதிப்புள்ள பங்குகள் அவருக்கு வழங்கப்பட உள்ளன. சுந்தர் பிச்சையின் தலைமையில் கூகுளின் சந்தை மதிப்பு பலமடங்கு உயர்ந்துள்ளது. சமீபத்தில் நிறுவனத்தின் மதிப்பு 4 டிரில்லியன் டாலர்களைத் தொட்டது ஒரு முக்கிய மைல்கல்லாகும். செயற்கை நுண்ணறிவு துறையில் நிலவும் கடும் போட்டியைச் சமாளிக்க, நிறுவனத்திற்குத் தலைசிறந்த தலைமை அவசியம் எனக் கருதி இந்த ஊதியத் தொகுப்பு வழங்கப்பட்டுள்ளது.

இந்த புதிய ஊதிய ஒப்பந்தத்தின் மூலம், சுந்தர் பிச்சையின் நிகர சொத்து மதிப்பு 1.5 பில்லியன் டாலர்களைத் தாண்டியுள்ளது. இதன் மூலம் அவர் அதிகாரப்பூர்வமாக 'பில்லியனர்' பட்டியலில் இணைந்துள்ளார். மைக்ரோசாஃப்ட் சிஇஓ சத்யா நாதெல்லா மற்றும் ஆப்பிள் சிஇஓ டிம் குக் ஆகியோரின் ஊதியத்தை விட, சுந்தர் பிச்சையின் இந்த புதிய ஒப்பந்தம் மிக அதிகமாகக் கருதப்படுகிறது.