பூமியின் நிலப்பரப்பில் பாயும் ஆறுகளைப் பற்றி நாம் அனைவரும் அறிவோம். ஆனால், கடலுக்கு அடியிலும் பிரம்மாண்டமான ஆறு ஒன்று பாய்ந்து கொண்டிருக்கிறது என்ற விசித்திரமான உண்மையை விஞ்ஞானிகள் கண்டறிந்துள்ளனர்.

ஐரோப்பாவிற்கும் ஆசியாவிற்கும் இடையே அமைந்துள்ள கருங்கடலின் ஆழமான பகுதியில், உலகின் 6-வது பெரிய நதிக்கு இணையான கொள்ளளவு கொண்ட நீர் ஓட்டம் நிலத்தடியில் பாய்வதை லீட்ஸ் பல்கலைக்கழக விஞ்ஞானிகள் அதிநவீன ரோபோடிக் கருவிகள் மூலம் துல்லியமாகக் கண்டறிந்துள்ளனர்.

கடலுக்குள் எப்படித் தனியாக ஒரு ஆறு பாய முடியும் என்ற கேள்வி நமக்கு எழலாம். இதற்குப் பின்னால் ஒரு சுவாரசியமான அறிவியல் பின்னணி உள்ளது. மத்திய தரைக்கடலில் இருந்து போஸ்பரஸ் நீரிணை வழியாகக் கருங்கடலுக்குள் பாயும் நீர், மிக அதிக அளவிலான உவர்ப்புத்தன்மையும் அடர்த்தியும் கொண்டது. இந்த அதிக அடர்த்தி கொண்ட உப்பு நீருடன், கடலடி வண்டல் மண்ணும் ஒன்று சேர்கிறது.

சுற்றியுள்ள சாதாரணக் கடல் நீரை விட இந்த நீர் அதிகப் பாரமாக இருப்பதனால், அது கடல் நீரோடு கலக்காமல், ஈர்ப்பு விசையின் காரணமாகக் கடலின் அடிவாரப் பள்ளத்தை நோக்கித் தனியாக ஒரு நதிப் பாதையை உருவாக்கி அதிவேகமாகப் பாய்கிறது.

இந்த ஆழ்கடல் ஆறு வெறும் நீரோட்டமாக மட்டும் இல்லாமல், நிலப்பரப்பில் நாம் காணும் ஆறுகளைப் போன்றே அச்சு அசலாகப் பல அதிசய அமைப்புகளைக் கொண்டுள்ளது. சாதாரண ஆறுகளைப் போலவே இதற்கும் இருபுறமும் கரைகள் மற்றும் வளைந்து நெளிந்து செல்லும் பாதைகள் உள்ளன.

இந்த ஆற்றின் பாதையில் திடீரென ஏற்படும் பள்ளங்களின் வழியே நீர் கீழ்நோக்கி வீழ்ந்து, பிரம்மாண்டமான 'கடலடி நீர்வீழ்ச்சிகளை' உருவாக்குகிறது.

நிலப்பரப்பில் ஆற்றின் கரைகளில் மரங்கள் வளர்ந்திருப்பதைப் போல, இந்த ஆழ்கடல் ஆற்றின் கரைகளிலும், அதன் வண்டல் படிவங்கள் மற்றும் கடல்சார் உயிரினங்களின் வளர்ச்சியால் மரங்கள் போன்ற விசித்திரமான இயற்கை வடிவங்கள் உருவாகியுள்ளன.

இந்தக் கடலடி ஆறு எவ்வளவு பெரியது என்பதை விளக்க விஞ்ஞானிகள் ஒரு ஒப்பீட்டை வழங்கியுள்ளனர். நிலப்பரப்பில் பாயும் ஆறுகளின் நீர் அளவோடு ஒப்பிட்டால், இது உலகின் 6-வது மிகப்பெரிய ஆற்றிற்கு இணையான நீர் நுகர்வைக் கொண்டுள்ளது. இந்த ஆற்றில் ஒவ்வொரு வினாடியும் சுமார் 22,000 கன மீட்டர் நீர் பாய்ந்து கொண்டிருக்கிறது. இந்த அளவு, ஐரோப்பாவின் மிகப்பெரிய நதியான 'ரைன்'  ஆற்றை விட 350 மடங்கு பெரியதாகும்.

வழக்கமான கடல் நீரோட்டங்கள் போல் அல்லாமல், நிலப்பரப்பு ஆறுகளின் அனைத்துக் குணங்களையும் கொண்டு பாயும் இந்தக் கருங்கடல் அடியிலுள்ள ஆறு, பூமியின் ஆழ்கடல் ரகசியங்களை ஆராயும் விஞ்ஞானிகளுக்குக் கிடைத்துள்ள ஒரு புதிய திறவுகோலாகும்.