தமிழக அரசின் மிக முக்கியத் திட்டங்களில் ஒன்றான 'தாயுமானவர் திட்டம்' தொடர்பாக, ரேஷன் கடை ஊழியர்கள் சங்கம் அரசுக்குக் கடுமையான எச்சரிக்கை ஒன்றை விடுத்துள்ளது. முதலமைச்சரின் இந்த திட்டத்தின் கீழ், தகுதியுள்ள பயனாளிகளின் வீடு வீடாகச் சென்று ரேஷன் பொருட்களை வழங்கும் பணியில் ஊழியர்கள் ஈடுபட்டு வரும் நிலையில், தங்களுக்கு ஏற்படும் நடைமுறைச் சிக்கல்கள் குறித்து அவர்கள் அடுக்கடுக்கான புகார்களை முன்வைத்துள்ளனர்.

இது குறித்து ரேஷன் கடை ஊழியர்கள் சங்கம் கூறுகையில், வீடு வீடாகச் சென்று பொருட்களை விநியோகம் செய்யும் பணியில், ஊழியர்களுக்குப் போதிய உள்கட்டமைப்பு மற்றும் கால அவகாசம் வழங்கப்படவில்லை என சங்கம் குற்றம் சாட்டியுள்ளது.

ஊழியர்கள் காலை 7 மணி முதல் இரவு 8 மணி வரை தொடர்ந்து வேலை செய்ய நிர்பந்திக்கப்படுவதாகக் கூறப்படுகிறது. இதனால் அவர்கள் கடுமையான மன உளைச்சலுக்கும், உடல்நல பாதிப்பிற்கும் ஆளாகி வருகின்றனர். இவ்வளவு நீண்ட நேரப் பணியின் போது, ஊழியர்களுக்கு முறையான உணவு இடைவேளையோ அல்லது கழிப்பறை போன்ற அத்தியாவசிய அடிப்படை வசதிகளோ கூடப் பல இடங்களில் மறுக்கப்படுவதாகச் சங்கம் சுட்டிக்காட்டியுள்ளது.

பொருட்களை விநியோகிக்கும் போது பயன்படுத்தப்படும் பயோமெட்ரிக் மற்றும் இணையப் பதிவு சாதனங்களில் ஏற்படும் தொடர் தொழில்நுட்பக் கோளாறுகளால், குறிப்பிட்ட நேரத்திற்குள் பணிகளை முடிக்க முடியாமல் ஊழியர்கள் தவித்து வருகின்றனர்.

தங்களின் கோரிக்கைகள் உடனடியாக நிறைவேற்றப்பட வேண்டும் என்பதில் ஊழியர்கள் சங்கம் உறுதியாக உள்ளது.  ரேஷன் கடை ஊழியர்கள் தற்பொழுது சந்தித்து வரும் இந்த கடுமையான பணிச்சுமை, தொழில்நுட்பக் கோளாறுகள் மற்றும் அடிப்படை வசதிகள் இல்லாமை போன்ற ஒட்டுமொத்தக் குறைகளும் நடப்பு ஜூன் மாத இறுதிக்குள் தமிழக அரசால் நிவர்த்தி செய்யப்பட வேண்டும். தவறும்பட்சத்தில், ஜூன் மாதத்திற்குப் பிறகு 'தாயுமானவர் திட்டப்' பணிகளை ஒட்டுமொத்தமாகப் புறக்கணிக்கப் போவதாக ஊழியர்கள் சங்கம் திட்டவட்டமாக எச்சரித்துள்ளது.