தமிழக நிதியமைச்சர் என். மரிய வில்சன் நேற்று சமர்ப்பித்த மாநிலத்தின் நிதி நிலை குறித்த வெள்ளை அறிக்கையில், "தமிழ்நாட்டின் ஒட்டுமொத்தக் கடன் சுமையின் அடிப்படையில் பார்த்தால், தற்போதைய சூழலில் ஒவ்வொரு குடிமகனின் தலையிலும் சராசரியாக ரூ. 1,28,934 கடன் உள்ளது" என்ற அதிர்ச்சித் தகவலை வெளியிட்டிருந்தார். "தமிழகத்தில் பிறக்கும் ஒவ்வொரு குழந்தையும் தனது பங்களிப்பைத் தொடங்கும் முன்பே, இந்தத் தலா நபர் கடனுடன்தான் பிறக்கிறது" என்றும் அவர் கவலை தெரிவித்திருந்தார்.

இந்நிலையில், இந்த அறிவிப்பைக் கேட்ட சென்னை உயர் நீதிமன்ற வழக்கறிஞர் ரியாஸ் அகமது என்பவர், நடிகர் விஜய் நடித்த 'தமிழன்' திரைப்படப் பாணியில், அரசுக்குத் தன் பங்காகச் செலுத்த வேண்டிய தலா நபர் கடனைத் தானே முன்வந்து செலுத்திப் பரபரப்பை ஏற்படுத்தியுள்ளார்.

அரசின் நிதிச் சுமையைக் குறைக்கும் நோக்கோடும், ஒரு பொறுப்புள்ள குடிமகனின் கடமையாகவும் கருதி, வழக்கறிஞர் ரியாஸ் அகமது இன்று தலைமைச் செயலகத்திற்கு நேரில் விரைந்தார். அங்கு தமிழக அமைச்சர் குமாரைச் சந்தித்துப் பேசிய அவர், நிதியமைச்சர் குறிப்பிட்ட தலா நபர் கடனான ரூ. 1,28,934-க்கான காசோலையை அரசிடம் முறைப்படி ஒப்படைத்தார்.

காசோலையை வழங்கிய பின் செய்தியாளர்களிடம் பேசிய வழக்கறிஞர் ரியாஸ் அகமது, "அரசு வெளியிட்டுள்ள வெள்ளை அறிக்கையின்படி, என் மீது இருப்பதாகக் கூறப்பட்ட கடன் தொகையை ஒரு குடிமகனாக நான் முழுமையாகச் செலுத்தி, எனது கடனை அடைத்துள்ளேன். நாட்டின் நிதி நெருக்கடியைச் சீரமைக்க அரசுக்கு என்னால் இயன்ற ஒரு சிறிய பங்களிப்பு இது."

திரைப்படங்களில் மட்டுமே பார்த்து ரசித்த இத்தகைய விழிப்புணர்வுச் சம்பவத்தை, நிஜ வாழ்க்கையிலும் ஒரு வழக்கறிஞர் சட்டப்பூர்வமாகச் செய்து காட்டியுள்ளது தலைமைச் செயலக வட்டாரங்கள் மற்றும் சமூக வலைதளங்களில்  பாராட்டுக்களையும், வியப்பையும் பெற்று வருகிறது.