தமிழ்நாட்டில் கடந்த நிதியாண்டில் டாஸ்மாக் மதுபான விற்பனை மூலம் ரூ.50,845 கோடி வருவாய் ஈட்டப்பட்டுள்ளதாகத் தரவுகள் வெளியாகியுள்ளன.

கடந்த 2025-26 ஆம் நிதியாண்டில் மட்டும் டாஸ்மாக் நிறுவனம் மொத்தம் ரூ.50,845 கோடியை வருவாயாக ஈட்டியுள்ளது. நடப்பு நிதியாண்டில் ஜூலை மாதம் வரை மட்டும் ரூ.17,854 கோடி வருவாய் ஈட்டப்பட்டுள்ள நிலையில், தமிழ்நாட்டில் மதுபான விற்பனை மூலம் அரசுக்கு ஒட்டுமொத்தமாக ரூ.56,000 கோடி வரை வருவாய் ஈட்ட இலக்கு நிர்ணயிக்கப்பட்டுள்ளது.

தமிழ்நாட்டில் தினசரி சராசரியாக ரூ.100 கோடிக்கும் அதிகமான மதிப்பில் மதுபானங்கள் விற்பனை செய்யப்பட்டு வருகின்றன. டாஸ்மாக் நிர்வாகத்தில் கொண்டுவரப்படும் சீர்திருத்தங்கள் மற்றும் மாற்றங்கள் வாயிலாக ஆண்டுதோறும் கூடுதலாக ரூ.1,200 கோடி வரை வருவாய் ஈட்டத் திட்டமிடப்பட்டுள்ளது. கடைகளின் வசதிகளை மேம்படுத்துதல் மற்றும் வெளிநாட்டு உயர்தர மதுபான பிராண்டுகளை எலைட் கடைகளில் அறிமுகப்படுத்துதல் போன்ற நடவடிக்கைகள் இதற்குப் பயன்படுத்தப்படவுள்ளன.

முறைகேடுகளைத் தடுத்து விற்பனையை முழுமையாக முறைப்படுத்த ஆன்லைன் ஆர்டர் உள்ளிட்ட நவீனக் கணினிமயமாக்கப்பட்ட தொழில்நுட்பங்களும் நடைமுறைப்படுத்தப்பட்டு வருகின்றன.