கோவையில் தனியார் கல்லூரி மாணவி ஒருவரை இன்ஸ்டாகிராம் மூலம் பழகி ஏமாற்றி, அவரது ஆபாச வீடியோவை வைத்துப் பணம் கேட்டு மிரட்டிய வழக்கில் சேலத்தைச் சேர்ந்த இரு வாலிபர்களைப் போலீசார் கைது செய்துள்ளனர். இந்த அதிர்ச்சிச் சம்பவத்தால் பாதிக்கப்பட்ட மாணவி தற்கொலைக்கு முயன்றது அப்பகுதியில் பெரும் பரபரப்பை ஏற்படுத்தியுள்ளது.

சேலம் மாவட்டத்தைச் சேர்ந்த அருணாச்சலம் மற்றும் சந்தோஷ் ஆகிய இரு வாலிபர்கள், கோவையில் உள்ள ஒரு தனியார் கல்லூரியில் படித்து வரும் மாணவியுடன் இன்ஸ்டாகிராம் சமூக வலைதளம் மூலமாகப் பழகியுள்ளனர். நாளடைவில் இந்தப் பழக்கம் நெருக்கமாக மாறியுள்ளது. இதனைப் பயன்படுத்திக் கொண்ட அந்த வாலிபர்கள், மாணவியை நம்பவைத்து அவரிடமிருந்த தங்க நகைகளை வாங்கி அடகு வைத்துப் பண மோசடி செய்துள்ளனர்.

நகைகளைப் பறித்ததோடு நிறுத்தாமல், அடுத்தகட்டமாக அந்த வாலிபர்கள் வாட்ஸ்-அப் வீடியோ கால் மூலம் மாணவியைத் தொடர்பு கொண்டுள்ளனர். அப்போது ஆசை வார்த்தைகளைக் கூறி, அந்த மாணவியை ஆடையின்றி நிர்வாணமாகப் பேச வைத்துள்ளனர். மாணவிக்குத் தெரியாமல் அந்த வீடியோ அழைப்பை அவர்கள் ரகசியமாகத் திரைப்பதிவு செய்து வைத்துள்ளனர்.

இதன் பின்னர் தங்களின் உண்மையான முகத்தைக் காட்டிய அருணாச்சலம் மற்றும் சந்தோஷ், தன்னிடம் உள்ள ஆபாச வீடியோவை சமூக வலைதளங்களில் வெளியிட்டு விடுவதாகக் கூறி மாணவியை மிரட்டத் தொடங்கியுள்ளனர். மேலும், அந்த வீடியோவை அழிக்க வேண்டும் என்றால் தங்களுக்குப் பெருமளவில் பணம் தர வேண்டும் என்றும் கட்டாயப்படுத்தியுள்ளனர்.

இதனால் கடுமையான மன உளைச்சலுக்கு ஆளான அந்த கல்லூரி மாணவி, வேறு வழியின்றி வீட்டில் தூக்கிட்டுத் தற்கொலை செய்ய முயன்றார். இதனைப் பார்த்து அதிர்ச்சியடைந்த குடும்பத்தினர் அவரை மீட்டு மருத்துவமனையில் அனுமதித்தனர். இச்சம்பவம் குறித்துப் பெற்றோர்கள் அளித்த புகாரின் பேரில் உடனடியாகச் செயல்பட்ட போலீசார், வழக்குப் பதிவு செய்து தலைமறைவாக இருந்த சேலம் வாலிபர்கள் அருணாச்சலம் மற்றும் சந்தோஷ் ஆகிய இருவரையும் அதிரடியாகக் கைது செய்து சிறையில் அடைத்தனர். மேலும் அவர்களது மொபைல் போன்களும் பறிமுதல் செய்யப்பட்டுள்ளன.