தமிழக முதலமைச்சராகப் பொறுப்பேற்ற பிறகு, முதல்முறையாக நாளை திருச்சியில் நடைபெறும் அரசு மற்றும் பொது நிகழ்ச்சிகளில் பங்கேற்பதற்காக முதலமைச்சர் விஜய் வருகை தர உள்ளார். இதற்கான விரிவான பாதுகாப்பு ஏற்பாடுகள் நகர் முழுவதும் செய்யப்பட்டு வரும் நிலையில், திருச்சி மாவட்ட ஆட்சியர் அலுவலக வளாகத்திற்கு திடீரென வெடிகுண்டு மிரட்டல் விடுக்கப்பட்டுள்ளது.

காவல் துறை கட்டுப்பாட்டு அறை மற்றும் மாவட்ட நிர்வாக அலுவலகத்திற்கு மின்னஞ்சல் வாயிலாக இந்த மர்ம மிரட்டல் வந்துள்ளதாகக் கூறப்படுகிறது. வெடிகுண்டு மிரட்டல் வந்ததைத் தொடர்ந்து, திருச்சி மாநகரக் காவல் ஆணையரின் உத்தரவின் பேரில், வெடிகுண்டு கண்டறிதல் மற்றும் அகற்றுதல் பிரிவு நிபுணர்கள் சம்பவ இடத்திற்கு விரைந்தனர்.

பாதுகாப்புப் படையினர் மோப்ப நாய் 'டயானா' மற்றும் உள்ளூர் காவல் துறை மோப்பநாய்களின் உதவியுடனும், நவீன மெட்டல் டிடெக்டர் கருவிகளைக் கொண்டும் மாவட்ட ஆட்சியர் அலுவலகத்தின் பிரதான கட்டடங்கள், வாகன நிறுத்துமிடங்கள் மற்றும் பொதுமக்கள் கூடும் பகுதிகள் என அனைத்து இடங்களிலும் தற்போது அங்குலம் அங்குலமாகத் தீவிரச் சோதனையில் ஈடுபட்டுள்ளனர்.

முதலமைச்சர் சி. ஜோசப் விஜய் முதலமைச்சராகப் பொறுப்பேற்ற பின் திருச்சிக்கு மேற்கொள்ளும் முதல் அதிகாரப்பூர்வப் பயணம் இது என்பதால், மாவட்ட நிர்வாகம் ஏற்கனவே விரிவான பாதுகாப்பு வளையத்தை ஏற்படுத்தியுள்ளது.

இந்த வெடிகுண்டு மிரட்டல் வெறும் வதந்தியாக இருக்கக்கூடும் எனப் போலீசார் கருதினாலும், முதலமைச்சரின் வருகையை முன்னிட்டு எவ்விதப் பாதுகாப்பு குறைபாடுகளும் ஏற்பட்டுவிடக் கூடாது என்பதில் திருச்சி மாவட்டக் காவல் துறை மிகவும் தீவிரமாக உள்ளது. இதனால் ஆட்சியர் அலுவலகத்திற்கு வரும் பொதுமக்கள் அனைவரும் கடுமையான சோதனைக்குப் பிறகே உள்ளே அனுமதிக்கப்படுகின்றனர்.

இந்த மிரட்டல் விடுத்த நபர் யார், எந்தப் பகுதியிலிருந்து இந்த மிரட்டல் விடுக்கப்பட்டது என்பதைத் துல்லியமாகக் கண்டறிய சைபர் க்ரைம் போலீசார் தற்போது விசாரணையில் இறங்கியுள்ளனர். மிரட்டல் வந்த  மின்னஞ்சல் முகவரியின் ஐபி தரவுகளைக் கொண்டு மர்ம நபரைத் தேடும் பணி முடுக்கிவிடப்பட்டுள்ளது. முதலமைச்சர் வருகைக்குச் சில மணி நேரங்களுக்கு முன்பு விடுக்கப்பட்டுள்ள இந்த மிரட்டல் ஒட்டுமொத்த திருச்சி மாவட்டத்தையும் தற்போது உஷார் நிலைக்குக் கொண்டு வந்துள்ளது.