தமிழகத்தின் ஜவுளி மற்றும் பின்னலாடைத் தொழிலுக்குப் பேரிடியாக, நூற்பாலைகள் நூல் விலையைக் கிலோவுக்கு மேலும் ரூ.5 உயர்த்தி அதிரடி அறிவிப்பை வெளியிட்டுள்ளன. நடப்பு ஜூன் மாதத்தில் மட்டும் நூல் விலை உயர்த்தப்படுவது இது 3-வது முறையாகும்.

இந்தத் தொடர் விலையேற்றம் காரணமாகத் திருப்பூர், கரூர், ஈரோடு மற்றும் கோவை உள்ளிட்ட பகுதிகளில் உள்ள ஜவுளி மற்றும் பின்னலாடைத் தொழில்துறையினர் பெரும் அதிர்ச்சியும் கவலையும் அடைந்துள்ளனர்.

பொதுவாகப் பருத்திப் பஞ்சின் விலை மற்றும் சந்தை நிலவரங்களின் அடிப்படையில் நூற்பாலைகள் மாதத்தின் தொடக்கத்தில் நூல் விலையை அறிவிப்பது வழக்கம். ஆனால், இந்த மாதத்தில் அடுத்தடுத்து 3 முறை நூல் விலை கிலோவுக்கு உயர்த்தப்பட்டுள்ளது. சர்வதேச சந்தையில் நிலவும் பருத்தி விலையின் ஏற்ற இறக்கங்கள், உள்நாட்டில் ஏற்பட்டுள்ள மூலப்பொருள் தட்டுப்பாடு மற்றும் நூற்பாலைகளின் உற்பத்திச் செலவு அதிகரிப்பு போன்ற காரணங்களால் இந்த விலை உயர்வு ஏற்பட்டுள்ளதாகக் கூறப்படுகிறது.

இந்தியாவின் மிகப்பெரிய பின்னலாடை மற்றும் ஏற்றுமதி மையமாகத் திகழும் திருப்பூரில், இந்தத் திடீர் நூல் விலை உயர்வு ஆடை உற்பத்திச் செலவை 15% முதல் 20% வரை உயர்த்தும் எனத் தொழில்துறையினர் வேதனை தெரிவிக்கின்றனர். ஏற்கனவே வெளிநாட்டு வர்த்தகர்களிடம் பழைய விலைக்கேற்ப ஒப்பந்தம் செய்யப்பட்டுள்ள நிலையில், தற்போது நூல் விலை உயர்ந்துள்ளதால் ஆடை உற்பத்தியாளர்கள் பெரும் நஷ்டத்தைச் சந்திக்க நேரிடும்.

புதிய ஆர்டர்களுக்கு விலையை உயர்த்தினால், பங்களாதேஷ், வியட்நாம், இலங்கை போன்ற போட்டி நாடுகளுக்குச் சர்வதேச ஆர்டர்கள் கைமாறிவிடும் அபாயமும் உள்ளது. நூல் விலையின் இந்தத் தொடர் அதிரடி உயர்வால் திருப்பூரின் சிறு, குறு நிறுவனங்களின் உற்பத்தி கடுமையாகப் பாதிக்கப்பட்டு, தொழில் முடங்கும் நிலைக்குத் தள்ளப்பட்டுள்ளதாக உற்பத்தியாளர்கள் கவலை தெரிவித்துள்ளனர். ஜவுளித் தொழிலை நம்பியுள்ள லட்சக்கணக்கான தொழிலாளர்களின் வாழ்வாதாரத்தைக் காக்க, மத்திய மற்றும் மாநில அரசுகள் தலையிட்டு நூல் விலை உயர்வை உடனடியாகக் கட்டுப்படுத்த வேண்டும் என்று ஜவுளி அமைப்புகள் கோரிக்கை விடுத்துள்ளன.