680 மாங்குரோவ் மரங்களை அகற்ற ஒப்புதல் - தானே கடற்கரைச் சாலை திட்டத்திற்கு இடையூறு!

மகாராஷ்டிர மாநிலம் தானே பகுதியில் கடற்கரைச் சாலை 2-ம் கட்டத் திட்டத்துக்காக 680 மாங்குரோவ் மரங்களை நிரந்தரமாக அகற்ற மாநிலக் கடலோர மண்டல மேலாண்மை ஆணையம் ஒப்புதல் அளித்துள்ளது.

முல்லுண்டு கிழக்கு ஆனந்த் நகர் முதல் தானேவின் பால்கும் பகுதி வரை சுமார் 7.12 கி.மீ. தூரத்துக்கு இந்தச் சாலை அமைக்கப்பட உள்ளது. திட்டப் பகுதியில் மொத்தம் 3,754 மாங்குரோவ் மரங்கள் உள்ளன. அவற்றில் 1,053 மரங்கள் கட்டுமானப் பணிகளின் போது பாதிக்கப்படலாம் என்றும், 2,021 மரங்கள் பெரும்பாலும் பாதிப்பின்றி விடப்படும் என்றும் தெரிவிக்கப்பட்டுள்ளது.

தானே நகரில் போக்குவரத்து நெரிசலைக் குறைப்பதே திட்டத்தின் நோக்கம் என அதிகாரிகள் கூறுகின்றனர். அதேநேரத்தில், இந்தத் திட்டத்துக்கு மத்திய சுற்றுச்சூழல் அமைச்சகத்தின் ஒப்புதல் உள்ளிட்ட கூடுதல் அனுமதிகள் இன்னும் தேவைப்படுகின்றன.