தூத்துக்குடியில் திமுக எம்.எல்.ஏ அனிதா ராதாகிருஷ்ணன் கைது செய்யப்பட்ட விவகாரம் தமிழக அரசியல் களத்தில்  காட்டுத்தீயாகப் பரவி பெரும் புயலைக் கிளப்பியுள்ளது.

முதலமைச்சர் குறித்துப் பொதுக்கூட்டத்தில் அவதூறாகப் பேசியதாகத் தொடரப்பட்ட வழக்கில், திமுக முன்னாள் அமைச்சர் அனிதா ராதாகிருஷ்ணன் இன்று மதியம் கைது செய்யப்பட்டதற்குத் திமுக தலைமை கடுமையான எதிர்ப்பைப் பதிவு செய்துள்ளது. இக்கைது நடவடிக்கை குறித்துத் திமுக அமைப்புச் செயலாளரும் முன்னாள் எம்பியுமான ஆர்.எஸ்.பாரதி தவெக அரசுக்கு எதிராக கண்டன அறிக்கை ஒன்றை வெளியிட்டுள்ளார்.

சென்னை அண்ணா அறிவாலயத்தில் செய்தியாளர்களைச் சந்தித்த திமுக அமைப்புச் செயலாளர் ஆர்.எஸ்.பாரதி, இக்கைது நடவடிக்கை முற்றிலும் ஒருதலைப்பட்சமானது எனத் தெரிவித்துள்ளார். "ஒரு பொதுக்கூட்டப் பேச்சுக்காக, அதுவும் வெறும் அவதூறு வழக்கு என்ற காரணத்தைக் காட்டி, பலமுறை அமைச்சராகவும்,   சிட்டிங் எம்.எல்.ஏ-வாகவும் இருக்கும் ஒரு மூத்த அரசியல் தலைவரை எவ்வித முன் அறிவிப்போ, சம்மனோ இன்றிப் பட்டப்பகலில் போலீசார் கைது செய்திருப்பது முற்றிலும் சட்டவிரோதமானது. ஜனநாயக நாட்டில் அரங்கேறியுள்ள இந்தச் செயல் ஒரு காட்டுமிராண்டித்தனமானது" என ஆர்.எஸ்.பாரதி சாடியுள்ளார்.

எதிர்க்கட்சிகளின் குரலவளையை நசுக்கத் தற்போதைய தவெக அரசு காவல்துறையைத் தவறான வழியில் பயன்படுத்துவதாகவும், ஆளுங்கட்சியின் இந்த மிரட்டல் உருட்டல்களுக்கெல்லாம் திமுக ஒருபோதும் அஞ்சாது என்றும் அவர் குறிப்பிட்டுள்ளார்.

அதிமுக முன்னாள் அமைச்சர் சி.வி.சண்முகத்தின் பாதுகாப்பு விவகாரத்தை ஒப்பிட்டுப் பேசிய அவர், முன்னாள் மக்கள் பிரதிநிதிகள் தற்போதைய ஆட்சியில் எதிர்கொள்ளும் நெருக்கடிகளைப் பட்டியலிட்டார்.

"தமிழகத்தில் மக்கள் செல்வாக்கு மிக்க எதிர்க்கட்சித் தலைவர்கள் மீது தொடர்ந்து பொய் வழக்குகளைப் போட்டு முடக்கி வைக்கத் திட்டமிட்டுச் சதி நடக்கிறது. அனிதா ராதாகிருஷ்ணனின் பேச்சுக்குக் கட்சியின் சட்டப் பிரிவு மூலம் நீதிமன்றத்தில் விளக்கம் அளிக்கத் தயாராக இருந்தோம். ஆனால், அதற்குள் இவ்வளவு அவசரமாகக் கைது செய்ய வேண்டிய அவசியம் என்ன வந்தது? இந்த விவகாரத்தை நாங்கள் சட்டப்பூர்வமாக நீதிமன்றத்தில் சந்தித்து ஆளுங்கட்சியின் முகத்திரையைக் கிழிப்போம்."

அனிதா ராதாகிருஷ்ணன் கைது செய்யப்பட்ட தகவல் பரவியதைத் தொடர்ந்து, தூத்துக்குடி, திருச்செந்தூர், ஆத்தூர் மற்றும் நாசரேத் ஆகிய பகுதிகளில் திமுக தொண்டர்கள் ஆங்காங்கே சாலை மறியல் மற்றும் தவெக அரசுக்கு எதிரான முழக்கப் போராட்டங்களில் ஈடுபட்டு வருகின்றனர்.

போராட்டங்கள் தீவிரமடைந்து சட்டம் ஒழுங்குப் பிரச்சினை ஏற்படுவதைத் தவிர்க்க, தூத்துக்குடி மாவட்டம் முழுவதும் முக்கிய சந்திப்புகளில் நூற்றுக்கணக்கான ஆயுதம் ஏந்திய போலீசார் பாதுகாப்புப் பணியில் குவிக்கப்பட்டுள்ளனர். திமுக எம்.எல்.ஏ-வின் இந்த அதிரடி கைது, வரவிருக்கும் மதுராந்தகம் உள்ளிட்ட 7 தொகுதி இடைத்தேர்தல் களம் தொடங்குவதற்கு முன்பாகவே தமிழக அரசியல் வட்டாரத்தில் மிகப்பெரிய சலசலப்பையும், ஆளுங்கட்சி - எதிர்க்கட்சி இடையேயான அரசியல் மோதலையும் உச்சகட்டத்திற்குக் கொண்டு சென்றுள்ளது.