தற்போதைய தவெக அரசின் செயல்பாடுகளைக் கடுமையாக விமர்சித்துள்ள எதிர்க்கட்சித் தலைவர் உதயநிதி ஸ்டாலின், திமுக இளைஞரணி மற்றும் கட்சியினருக்கு எதிராக ஆளும் அரசு அடக்குமுறையைக் கையாள்வதாகக் குற்றம் சாட்டியுள்ளார். நிர்வாகத்திறனற்ற இந்த அரசின் 'சோபா மாடல்' போலி பிம்பம் இளைஞர்கள் மத்தியில் உடைந்து நொறுங்கி வருவதைத் தாங்கிக் கொள்ள முடியாமல், ஆட்சியாளர்கள் காவல்துறையைத் தவறாகப் பயன்படுத்தி வருவதாக அவர் சாடியுள்ளார்.

சமீபகாலமாக தவெக அரசின் கொள்கைகள் மற்றும் நிர்வாகத் திறனை விமர்சித்து திமுக மற்றும் அதன் இளைஞரணியினர் சமூக வலைத்தளங்களிலும், மக்கள் மத்தியிலும் தொடர் பிரச்சாரங்களை மேற்கொண்டு வருகின்றனர். இது குறித்துச் செய்தியாளர்களிடம் பேசிய எதிர்க்கட்சித் தலைவர் உதயநிதி ஸ்டாலின், "தற்போதைய ஆளும் அரசின் நிர்வாகத் திறமையின்மை நாளுக்கு நாள் வெளிப்பட்டு வருகிறது. இவர்களின் 'சோபா மாடல்' ஆட்சியின் போலி பிம்பம், தமிழ்நாட்டு இளைஞர்களிடம் முற்றிலும் நொறுங்கிப் போய்விட்டது. இதனால் ஏற்பட்டுள்ள அரசியல் பயம் காரணமாகவே, ஆளுங்கட்சியினர் அடக்குமுறையைக் கையில் எடுத்துள்ளனர்" என்று குறிப்பிட்டார்.

திமுக இளைஞர்களைக் குறிவைத்துத் தற்போதைய அரசு காவல்துறை மூலம் மிரட்டல் விடுத்து வருவதாகக் குறிப்பிட்ட அவர், அரசிற்குத் தனது கடுமையான எச்சரிக்கையையும் விடுத்துள்ளார். "அரசின் தவறுகளைத் தட்டிக்கேட்கும் எங்களது கழக இளைஞர்களைக் காவல்துறையை ஏவி அச்சுறுத்தலாம், முடக்கலாம் என்று தற்போதைய ஆளும் அரசு நினைத்தால் அது பகற்கனவாகவே முடியும். எத்தனையோ அடக்குமுறைகளையும், வழக்குகளையும் சந்தித்து வளர்ந்த இயக்கம் இது."

 "அதிகார பலத்தைக் கொண்டு எங்கள் அணியினரை மிரட்ட நினைத்தால், அதனைத் திமுக ஒருபோதும் வேடிக்கை பார்த்துக் கொண்டிருக்காது. தொண்டர்களுக்குப் பின்னால் ஒட்டுமொத்தக் கழகமும் அரணாக நிற்கும்" என்று உதயநிதி ஸ்டாலின் மிகக் கடுமையான வார்த்தைகளில் எச்சரித்துள்ளார்.