சென்னை டாக்டர் ராதாகிருஷ்ணன் நகர் சட்டமன்றத் தொகுதியில் தமிழக வெற்றிக் கழகத்தின் சார்பில் போட்டியிட்டு வெற்றி பெற்று அமைச்சராகப் பொறுப்பேற்றுள்ள என். மரிய வில்சனின் வெற்றிக்கு எதிராகத் தொடரப்பட்ட வழக்கில், அவர் நேரிடையாகப் பதிலளிக்க சென்னை உயர் நீதிமன்றம் உத்தரவிட்டுள்ளது.

கடந்த ஏப்ரல் மாதம் நடைபெற்ற 2026 தமிழகச் சட்டமன்றத் தேர்தலில், சென்னை ஆர்.கே.நகர் தொகுதியில் தவெக சார்பில் போட்டியிட்ட டாக்டர் என். மரிய வில்சன்  வெற்றி பெற்றார். இவரது வெற்றியைச் செல்லாது என அறிவிக்கக் கோரி, ஆர்.கே.நகர் தொகுதியைச் சேர்ந்த வாக்காளரான மருது கணேஷ் என்பவர் சென்னை உயர் நீதிமன்றத்தில் தேர்தல் வழக்கை தாக்கல் செய்திருந்தார்.

அந்த மனுவில், "தவெக வேட்பாளர் மரிய வில்சன் தனது தேர்தல் வேட்புமனுவுடன் தாக்கல் செய்திருந்த பிரமாணப் பத்திரத்தில் தனது சொத்து விபரங்கள், கடன்கள் மற்றும் அவர் மீது நிலுவையில் உள்ள கிரிமினல் வழக்குகள் குறித்த விபரங்களை முழுமையாக வெளிப்படுத்தாமல் மறைத்துள்ளார்."

"பிரமாணப் பத்திரத்தில் முரணான மற்றும் உண்மைக்குப் புறம்பான தகவல்களை அளித்து, தேர்தல் விதிமுறைகளை மீறி முறைகேடு செய்து அவர் வெற்றி பெற்றுள்ளார். எனவே, மக்கள் பிரதிநிதித்துவச் சட்டத்தின்படி அவரது வெற்றியைச் செல்லாது என நீதிமன்றம் அறிவிக்க வேண்டும்" என்று அந்த மனுவில் கோரப்பட்டிருந்தது.

இந்தத் தேர்தல் வழக்கு இன்று சென்னை உயர் நீதிமன்றத்தில் நீதிபதி முன்னிலையில் விசாரணைக்கு வந்தது. மனுதாரர் தரப்பு வாதங்களைக் கேட்டறிந்த நீதிபதி, இந்த விவகாரத்தில் முதற்கட்ட விசாரணையைத் தொடங்கும் பொருட்டு, புகாருக்கு உள்ளாகியிருக்கும் அமைச்சர் மரிய வில்சன் இந்த மனு குறித்து விரிவான விளக்கத்தை நீதிமன்றத்தில் தகுந்த ஆதாரங்களுடன் பதிலளிக்க வேண்டும் என உத்தரவிட்டு நோட்டீஸ் அனுப்ப ஆணையிட்டார்.

ஆர்.கே.நகர் தொகுதி மட்டுமன்றித் தமிழகத்தின் பல்வேறு தொகுதிகளில் நடைபெற்ற தேர்தல் முறைகேடுகள் மற்றும் பிரமாணப் பத்திரக் குளறுபடிகள் தொடர்பான வழக்குகளிலும் உயர் நீதிமன்றம் இன்று உத்தரவுகளைப் பிறப்பித்துள்ளது.

இதேபோன்ற தேர்தல் பிரமாணப் பத்திர முரண்பாட்டுப் புகார்களின் கீழ், தவெகவின் மூத்த அமைச்சரான கே.ஏ. செங்கோட்டையன், அதிமுக முன்னாள் அமைச்சர்களான சி.வி. சண்முகம் மற்றும் கே.சி. வீரமணி ஆகியோருக்கும் சென்னை உயர் நீதிமன்றம் தனித்தனியே நோட்டீஸ் அனுப்பி, தங்களது விளக்கத்தை நீதிமன்றத்தில் தாக்கல் செய்ய உத்தரவிட்டுள்ளது.

தமிழகத்தில் புதிய கூட்டணி ஆட்சி அமைந்து 50 நாட்களைக் கடந்துள்ள நிலையில், தவெகவின் முக்கிய முகமும், மாநில நிதியமைச்சருமான மரிய வில்சன் மீது நீதிமன்றம் இந்தத் தேர்தல் வழக்கை விசாரணைக்கு ஏற்றுக்கொண்டுள்ளது கோட்டை வட்டாரத்தில் பெரும் சலசலப்பை ஏற்படுத்தியுள்ளது. இந்த நீதிமன்ற உத்தரவைத் தொடர்ந்து சென்னை உயர் நீதிமன்ற வளாகம் மற்றும் ஆர்.கே.நகர் பகுதிகளில் தொண்டர்கள் கூடுவதைத் தவிர்க்கவும், சட்டம்-ஒழுங்கைப் பராமரிக்கவும் போலீசார் ஆங்காங்கே தகுந்த பாதுகாப்பு மற்றும் கண்காணிப்புப் பணிகளை மேற்கொண்டு வருகின்றனர்.