சாதி மறுப்பு திருமணம்.. தங்கை கணவர் படுகொலை.. அண்ணன் உட்பட 5 பேர் அதிரடியாக கைது!
சென்னை பள்ளிக்கரணை பகுதியை சேர்ந்த கூலித்தொழிலாளி பிரவீன் (26). தாழ்த்தப்பட்ட வகுப்பைச் சேர்ந்த இவருக்கும், ஜல்லடம்பேட்டை பகுதியில் வசிக்கும் மாற்று சமூகத்தைச் சேர்ந்த ஷர்மி என்ற பெண்ணுக்கும் கடந்த 4 மாதங்களுக்கு முன்பு காதல் திருமணம் நடந்தது. பின்னர் இருவரும் பள்ளிக்கரணை பகுதியில் ஒன்றாக வசித்து வந்துள்ளனர்.
ஷர்மி வேறு சமூகத்தை சேர்ந்த ஒருவரை காதலித்து திருமணம் செய்தது பெண் வீட்டாருக்கு பிடிக்கவில்லை என்று கூறப்படுகிறது. இதனால் ஷர்மியின் காதலுக்கு எதிர்ப்பு தெரிவித்து வந்தனர். அதுமட்டுமின்றி பெற்றோரின் அறிவுரையை மீறி பிரவீனை திருமணம் செய்த ஷர்மியை பழிவாங்க நினைத்தனர்.
இந்த நிலையில் நேற்று இரவு பிரவீன் பள்ளிக்கரணை பகுதியில் உள்ள டாஸ்மாக் பாரில் குடிக்க சென்றார். பின்னர் குடித்துவிட்டு வெளியே வந்த பிரவீனை 4 பேர் கொண்ட கும்பல் சரமாரியாக வெட்டிக் கொன்றுவிட்டு தப்பிச் சென்றது. இதை பார்த்து அதிர்ச்சி அடைந்த அப்பகுதி மக்கள் உடனடியாக பள்ளிக்கரணை போலீஸ் நிலையத்திற்கு தகவல் கொடுத்தனர்.
தகவலின் பேரில் போலீசார் அங்கு வந்து ரத்த வெள்ளத்தில் கிடந்த பிரவீனை மீட்டு ராயப்பேட்டை மருத்துவமனையில் சிகிச்சைக்காக சேர்த்தனர். இதையடுத்து மருத்துவமனையில் அனுமதிக்கப்பட்ட பிரவீன் இரவு உயிரிழந்தார். இந்த கொலை குறித்து போலீசார் வழக்குப்பதிவு செய்து விசாரணை நடத்தி வருகின்றனர்.
முதற்கட்ட விசாரணையில், பிரவீன் வேறு சமூகத்தைச் சேர்ந்த பெண்ணை காதலித்து திருமணம் செய்ததால் ஆத்திரமடைந்த பெண்ணின் அண்ணன் தினேஷ், தனது நண்பர்களுடன் சேர்ந்து பிரவீனை கொன்றுவிட்டு தப்பியோடியது தெரியவந்தது. இதையடுத்து தனிப்படை அமைத்து தப்பியோடிய கும்பலை போலீசார் தேடி வந்தனர். இதையடுத்து தாம்பரம் அருகே தலைமறைவாக இருந்த ஷர்மியின் அண்ணன் தினேஷ் மற்றும் அவரது நண்பர்களான ஸ்டீபன், ஸ்ரீவிஷ்ணு, ஜோதிலிங்கம் உள்ளிட்ட ஐந்து பேரை கைது செய்து விசாரணை மேற்கொண்டனர்.
விசாரணையில், குடும்பத்தினரின் எதிர்ப்பை மீறி பிரவீனை திருமணம் செய்த சம்பவத்திற்கு பழிவாங்க, தினேஷின் தங்கை ஷர்மியின் கணவனை பிரவீனை கொன்றது தெரியவந்தது. தொடர்ந்து போலீசார் நடத்திய விசாரணையில் படுகொலை செய்யப்பட்ட பிரவீன், 2022ல் பள்ளிக்கரணை பகுதியில் சாம் கொலை செய்யப்பட்ட வழக்கில் ஏ3 குற்றவாளியாக கைது செய்யப்பட்டு சிறையில் அடைக்கப்பட்டது தெரியவந்தது.
இதையடுத்து நேற்று இரவு தினேஷுக்கு போன் செய்த விஷ்ணு, ஷர்மியின் அண்ணன் உன்னிடம் பேச விரும்புவதாக கூறி மதுபான விடுதிக்கு வருமாறு கூறியுள்ளார். அதன்பின், அங்கு வந்த பிரவீனை ஒரு கும்பல் சுற்றி வளைத்து தாக்கி வெட்டிக் கொன்றது தெரியவந்தது.
இதைத் தொடர்ந்து 307 கொலை முயற்சி என பதிவு செய்த வழக்கை 302 IPC கொலை வழக்காக மாற்றி தாழ்த்தப்பட்டோர் வன்கொடுமை தடுப்பு சட்டம் என்ற பிரிவில் பதிந்து கைது செய்யப்பட்ட நபர்களிடம் தீவிர விசாரணை மேற்கொண்டு வருகின்றனர்.
லட்சத்துல கடன் இருந்தாலும் ஈஸியா தீர்க்கும் எளிய பரிகாரம்!
வாழ்வில் செல்வமும், அதிர்ஷ்டமும் கிடைக்க இதை மறக்காதீங்க!
பாதாள அறையில் சாய்பாபா! ஷீரடி போகும் போது இதை மிஸ் பண்ணாதீங்க!