தமிழகத்தில் ஆளுங்கட்சியாக இருக்கும் தவெக ஆரம்பகால நிர்வாகிகள் மற்றும் மாற்றுக்கட்சிகளிலிருந்து வந்தவர்களுக்கு இடையே நிலவி வரும் உட்கட்சி மோதல் தற்போது விஸ்வரூபம் எடுத்துள்ளது. குறிப்பாக, அண்மையில் அதிமுகவில் இருந்து விலகி தவெகவில் இணைந்த முக்கிய விஐபிக்கள் தங்களுக்குக் கட்சிப் பதவிகளோ அல்லது வாரியப் பதவிகளோ உடனடியாக வழங்கப்பட வேண்டும் எனப் போர்க்கொடி தூக்கியிருப்பது முதலமைச்சர் விஜய் மற்றும் கட்சித் தலைமைக்குப் பெரும் தலைவலியை ஏற்படுத்தியுள்ளது.

சட்டமன்றத் தேர்தலுக்கு முன்பாக அதிமுகவிலிருந்து விலகி தவெகவின்வெற்றிக்காகப் பணியாற்றிய முக்கிய மூத்த தலைவர்கள் பலர், ஆட்சிப் பொறுப்பேற்றும் இதுவரையில் தங்களுக்கு எவ்வித அங்கீகாரமும் வழங்கப்படவில்லை எனத் தங்களின் அதிருப்தியை வெளிப்படுத்தியுள்ளனர். தங்களுக்குக் கட்சியின் உயர்மட்டப் பொறுப்புகள் அல்லது அரசு வாரியத் தலைவர் பதவிகள் உடனடியாக வழங்கப்பட வேண்டும் என அவர்கள் தலைமைக்கு நெருக்கடி கொடுத்து வருகின்றனர்.

இவர்களுடன் சேர்ந்து அமைச்சரவையில் இடம் கிடைக்காமல் போன தவெகவின் சட்டமன்ற உறுப்பினர்கள் சிலரும் தங்களுக்குத் தகுந்த அரசுப் பொறுப்புகள் வழங்கக் கோரி ரகசியமாகப் போர்க்கொடி தூக்கியுள்ளனர். மாற்றுக்கட்சியிலிருந்து வந்தவர்களின் இந்த பதவி வேட்கை, தவெகவின் ஆரம்பகால மற்றும் அடிமட்டத் தொண்டர்கள் மத்தியில் பெரும் கொந்தளிப்பை ஏற்படுத்தியுள்ளது:

"கட்சியின் தொடக்கக் காலத்தில் எவ்வித எதிர்பார்ப்பும் இன்றி உழைத்த தங்களுக்கு முன்னுரிமை அளிக்காமல், தேர்தல் நேரத்தில் சுயநலத்திற்காக வந்த மாற்றுக்கட்சி விஐபிக்களுக்கு அரசுப் பதவிகளை வாரி வழங்கக் கூடாது" என ஆரம்பகால மாவட்டச் செயலாளர்கள் கட்சித் தலைமையிடம் தங்களது எதிர்ப்பைப் பதிவு செய்துள்ளனர். தவெகவின் உட்கட்சிப் பூசல் இந்த அளவிற்குப் பகிரங்கமாக வெடித்துள்ளது அரசியல் வட்டாரத்தில் பரபரப்பை ஏற்படுத்தியுள்ளது.