வெற்றி போதையில் தவெக எம்.எல்.ஏ. ஆட்டம்? பீர் பாட்டிலுடன் இருக்கும் வீடியோவால் சர்ச்சை!

தமிழக சட்டமன்றத் தேர்தல் முடிவுகளில் தஞ்சாவூர் தொகுதியில் தமிழக வெற்றிக் கழகம் சார்பில் போட்டியிட்டு வெற்றிபெற்ற விஜய் சரவணன், கையில் பீர் பாட்டிலுடன் மது அருந்திவிட்டு ஆட்டம்போடும் வீடியோ ஒன்று வெளியாகி சமூக வலைத்தளங்களில் பெரும் அதிர்ச்சியை ஏற்படுத்தியுள்ளது. தேர்தலில் வெற்றிபெற்ற குஷியில் தனது நண்பர்களுடன் சேர்ந்து அவர் இவ்வாறு பொதுவெளியில் ஆட்டம்போடுவதாக எதிர்க்கட்சியினர் கடுமையாகக் குற்றம்சாட்டி வருகின்றனர். புதிய அரசியல் மாற்றத்தை முன்வைக்கும் கட்சியின் மக்கள் பிரதிநிதி இவ்வாறு பொறுப்பற்ற முறையில் நடந்துகொள்வது கண்டிக்கத்தக்கது எனப் பலரும் கருத்து தெரிவித்துள்ளனர்.

இந்த வீடியோ காட்டுத்தீ போலப் பரவி வரும் நிலையில், தமிழக வெற்றிக் கழகத்தினர் இதற்குப் மறுப்பு தெரிவித்து விளக்கம் அளித்துள்ளனர். இது தற்போது எடுக்கப்பட்ட வீடியோ அல்ல என்றும், விஜய் சரவணன் அரசியலுக்கு வருவதற்கு முன்பு எடுக்கப்பட்ட பழைய வீடியோவை எதிர்க்கட்சியினர் திட்டமிட்டு இப்போது பரப்பி வருவதாகவும் தவெகவினர் வாதிடுகின்றனர். கட்சியின் நற்பெயரைக் கெடுப்பதற்காகவே இத்தகைய செயல்கள் அரங்கேற்றப்படுவதாக அவர்கள் தெரிவித்துள்ள போதிலும், சமூக வலைத்தளங்களில் இந்த விவகாரம் தொடர்பான விவாதம் இன்னும் ஓய்ந்தபாடில்லை.

தேர்தலில் வெற்றிபெற்று வரும் 7-ம் தேதி சட்டமன்ற உறுப்பினராகப் பதவியேற்க உள்ள நிலையில், விஜய் சரவணனின் இந்தச் செயல் அரசியல் வட்டாரத்தில் கடும் விமர்சனத்திற்குள்ளாகியுள்ளது. ஒரு சட்டமன்ற உறுப்பினருக்கு உரிய கண்ணியத்துடன் அவர் நடந்துகொள்ள வேண்டும் என்றும், இத்தகைய செயல்கள் இளைஞர்களுக்குத் தவறான முன்மாதிரியாக அமையும் என்றும் பொதுமக்கள் சமூக வலைத்தளங்களில் அதிருப்தி வெளியிட்டு வருகின்றனர். இந்த விவகாரம் தொடர்பாகத் தவெக தலைமை உரிய விசாரணை நடத்தி விளக்கம் அளிக்க வேண்டும் என்ற கோரிக்கையும் எழுந்துள்ளது.