“விஜய்க்கு வெற்றிவேல் வழங்கிய கோயில் நிர்வாகம்” - திருச்செந்தூர் முருகனிடம் சிறப்பு வழிபாடு.. குவிந்த ரசிகர்கள்!

தமிழக வெற்றிக் கழகத்தின் தலைவரும், நடிகருமான விஜய் இன்று (ஏப்ரல் 28) அதிகாலை திருச்செந்தூர் சுப்பிரமணிய சுவாமி திருக்கோவிலில் சாமி தரிசனம் செய்தது அரசியல் மற்றும் சினிமா வட்டாரங்களில் பெரும் பேசுபொருளாகியுள்ளது.

நேற்று இரவு சென்னையிலிருந்து தனி விமானம் மூலம் மதுரை வந்தடைந்த விஜய், அங்கிருந்து கார் மூலம் சாலை மார்க்கமாகப் புறப்பட்டு அதிகாலை திருச்செந்தூர் வந்தடைந்தார். வழக்கமான பாணியில் பட்டு வேட்டி மற்றும் சட்டை அணிந்து, எளிமையான முறையில் கோவிலுக்கு வருகை தந்தார்.

மூலவர் சுப்பிரமணிய சுவாமியை மனமுருகி தரிசனம் செய்தார். அவருக்குக் கோவில் நிர்வாகம் சார்பில் பூரண கும்ப மரியாதை அளிக்கப்பட்டது. கோவில் சார்பில் அவருக்குத் திருச்செந்தூரின் அடையாளமான 'வெற்றி வேல்' வழங்கி கௌரவிக்கப்பட்டது. மூலவர் தரிசனத்திற்குப் பிறகு, திருச்செந்தூர் கடற்கரைக்கும் சென்று கடலைத் தொட்டு வணங்கி தனது வழிபாட்டை நிறைவு செய்தார்.

விஜய் வருவதை அறிந்த ஆயிரக்கணக்கான ரசிகர்கள் மற்றும் பொதுமக்கள் அதிகாலை முதலே கோவில் வளாகத்தில் குவிந்தனர். அவர் வெளியே வரும்போது ரசிகர்கள் உற்சாகமாக முழக்கமிட்டதால் பெரும் கூட்ட நெரிசல் ஏற்பட்டது.

எவ்வித அசம்பாவிதமும் நேராமல் தடுக்க, திருச்செந்தூர் முழுவதும் மாவட்ட காவல்துறை சார்பில் பலத்த பாதுகாப்பு போடப்பட்டிருந்தது. கூட்டத்தைக் கட்டுப்படுத்த போலீசார் தடியடி நடத்தாமல் சீராக முறைப்படுத்தினர்.

தமிழக சட்டமன்றத் தேர்தலின் வாக்கு எண்ணிக்கை மே 4-ம் தேதி நடைபெறவுள்ள நிலையில், விஜய்யின் இந்தத் திடீர் ஆன்மீகப் பயணம் அரசியல் முக்கியத்துவம் வாய்ந்ததாகக் கருதப்படுகிறது.

கட்சியின் பெயரிலேயே 'வெற்றி' இருப்பதாலும், தற்போது 'வெற்றி வேல்' வழங்கப்பட்டிருப்பதாலும் தவெக தொண்டர்கள் இதனை ஒரு நல்ல சகுனமாகப் பார்க்கின்றனர். ஏற்கனவே 85.15% வாக்குப்பதிவு நடைபெற்றுள்ள சூழலில், இந்தத் தரிசனம் தேர்தல் முடிவுகள் குறித்த எதிர்பார்ப்பை இன்னும் அதிகரித்துள்ளது.