திருவண்ணாமலை அருணாசலேஸ்வரர் கோயிலில் இன்று நிகழும் சந்திர கிரகணத்தின் போது, மற்ற கோயில்களைப் போல நடை சார்த்தப்படாமல் தரிசனத்திற்காகத் திறந்திருக்கும் என அறிவிக்கப்பட்டுள்ளது. 

பொதுவாகச் சூரிய மற்றும் சந்திர கிரகணங்களின் போது, தீட்டு எனக் கருதப்பட்டு அனைத்துத் திருக்கோயில்களின் நடை சார்த்தப்படுவது வழக்கம். ஆனால், திருவண்ணாமலை அண்ணாமலையார் கோயிலில் மட்டும் இந்த விதியிலிருந்து விலக்கு அளிக்கப்படுகிறது.

திருவண்ணாமலை திருத்தலம் பஞ்சபூதங்களில் 'அக்னி' தலம் ஆகும். அக்னிக்கு எவ்விதத் தீட்டும் அண்டாது என்பது ஆகம விதி. எனவே, கிரகண காலத்திலும் இங்கே இறைவனுக்கு எந்தப் பாதிப்பும் ஏற்படுவதில்லை எனக் கருதப்படுகிறது. இதன் காரணமாக, கிரகணத் தொடக்கம் முதல் முடிவு வரை கோயில் நடை சார்த்தப்படாமல் பக்தர்கள் வழக்கம்போலச் சாமி தரிசனம் செய்ய அனுமதிக்கப்படுவர்.

கிரகணக் காலத்தில் அண்ணாமலையாருக்கும், உண்ணாமுலை அம்மனுக்கும் சிறப்பு அபிஷேகங்கள் மற்றும் ஆராதனைகள் நடைபெறும். கிரகணம் முழுமையாக முடிவடைந்த பிறகு, கோயில் வளாகத்தில் உள்ள பிரம்ம தீர்த்தத்தில் 'தீர்த்தவாரி' உற்சவம் நடைபெறும். அதன் பின்னரே வழக்கமான கால பூஜைகள் தொடரும்.

திருவண்ணாமலைக்கு மாறாக, திருப்பதி ஏழுமலையான் கோயில் காலை 9 மணி முதல் இரவு 7:30 மணி வரை நடை சார்த்தப்பட்டிருக்கும். அதேபோல், மருதமலை முருகன் கோயில் மற்றும் சதுரகிரி சுந்தர மகாலிங்கம் கோயில் போன்றவையும் கிரகண நேரத்தைக் கருத்தில் கொண்டு நடை சார்த்தப்படும் என அறிவிக்கப்பட்டுள்ளன.

திருவண்ணாமலையில் இன்று கிரகண நேரத்தில் கிரிவலம் செல்வது மிகவும் விசேஷமானது எனக் கருதப்படுகிறது. எனவே இன்று திருவண்ணாமலைக்கு கிரிவலம் வரும் பக்தர்களுக்காகக் கூடுதல் பாதுகாப்பு ஏற்பாடுகள் செய்யப்பட்டுள்ளன.