தமிழகச் சட்டமன்றத் தேர்தல் களம் இறுதிக்கட்டத்தை எட்டியுள்ள நிலையில், பெரம்பலூரில் நாம் தமிழர் கட்சி வேட்பாளர்களை ஆதரித்துப் பேசிய சீமான், திராவிடக் கட்சிகளையும் அவர்களின் மொழிக் கொள்கையையும் கடுமையாக விமர்சித்துப் பேசினார்.

பிரசாரத்தின் போது தொண்டர்களிடையே பேசிய சீமான், "தற்போதுள்ள அரசியல் சூழலில் நான்கு பக்கமும் நமக்கு எதிரிகள் இருக்கிறார்கள். அந்த எதிரிகளுக்கு நடுவில் நாம் தமிழர் கட்சி தனித்து நின்று போராடுகிறது என்பதைப் பொதுமக்கள் உணர்ந்து வாக்களிக்க வேண்டும்," என்று வேண்டுகோள் விடுத்தார்.

தமிழகத்தில் நீண்டகாலமாகப் பின்பற்றப்பட்டு வரும் இருமொழிக் கொள்கை குறித்துச் சீமான் தனது ஆதங்கத்தைப் பதிவு செய்தார். "இன்று வணிக நிறுவனங்களின் பெயர்களைப் பார்த்தால், எழுத்து தமிழாக இருக்கும், ஆனால் உச்சரிப்பு ஆங்கிலமாக இருக்கும். அல்லது எழுத்து ஆங்கிலத்தில் இருக்கும், உச்சரிப்பு தமிழில் இருக்கும். இதுதான் திராவிடர்கள் வளர்த்த இருமொழிக் கொள்கையா?" என வினவினார்.

இத்தகைய போக்கினால் நம் முன்னோர்கள் போற்றி வளர்த்த தூய தமிழ் மொழி சிதைந்து வருவதாக அவர் குற்றம் சாட்டினார். தமிழின் சிறப்பைப் பற்றிக் குறிப்பிட்ட சீமான், "உலகில் உள்ள எல்லா மொழிகளும் மனிதர்களால் உருவாக்கப்பட்டவை. ஆனால், தமிழ் மொழி மட்டும்தான் இறைவனால் பேசப்பட்ட மொழி. சில மொழிகள் பிறந்த பிறகு சிறப்படையும், ஆனால் தமிழ் மொழி பிறக்கும்போதே சிறந்த மொழியாகப் பிறந்தது. இது இயற்கையின் மொழி," எனப் பெருமிதத்துடன் கூறினார்.