நிரம்பி வழியும் காத்திருப்பு அறைகள்...  திருப்பதியில் 5 கிலோ மீட்டர் தூரத்திற்கு நீண்ட வரிசை!

கோடை விடுமுறையையொட்டி திருப்பதி ஏழுமலையான் கோவிலில் சாமி தரிசனம் செய்வதற்காக நாடு முழுவதிலும் இருந்து வரலாறு காணாத அளவில் பக்தர்கள் குவிந்து வருகின்றனர். கடந்த 5 நாட்களாகத் திருமலையில் பக்தர்களின் கூட்டம் அலைமோதி வருவதால் வைகுண்டம் காத்திருப்பு அறைகளைத் தாண்டி வெளிப்பகுதிகளிலும் மக்கள் கூட்டம் நிரம்பி வழிகிறது. இதனால் சுமார் 5 கிலோ மீட்டர் தூரத்திற்கு அப்பால் உள்ள படைவீரர்கள் அலுவலகம் வரை பக்தர்கள் நீண்ட வரிசையில் சாமி தரிசனத்திற்காகக் காத்திருக்கிறார்கள்.

இந்தக் கடுமையான கூட்ட நெரிசலைக் கருத்தில் கொண்டு திருப்பதி தேவஸ்தானம் பல்வேறு சிறப்பு அடிப்படை வசதிகளைச் செய்து கொடுத்துள்ளது. கோடை வெயிலின் தாக்கத்திலிருந்து பக்தர்களைப் பாதுகாக்கும் வகையில் நிழற்பந்தல்கள் மற்றும் நடமாடும் குடிநீர்தொட்டிகள் அமைக்கப்பட்டுத் தொண்டர்கள் மூலம் உணவுகளும் வழங்கப்பட்டு வருகின்றன. திருமலையில் தங்கும் விடுதிகள் அனைத்தும் முழுமையாக நிரம்பிவிட்டதால் பல்லாயிரக்கணக்கான பக்தர்கள் பூங்காக்களிலும் சாலை ஓரங்களிலும் தங்கி ஓய்வெடுத்து வருகின்றனர்.

கடந்த 5 நாட்களில் மட்டும் 4 லட்சத்து 32 ஆயிரத்து 213 பக்தர்கள் ஏழுமலையானைத் தரிசனம் செய்துள்ளதாக தேவஸ்தானம் அதிகாரப்பூர்வமாகத் தெரிவித்துள்ளது. அதேபோல் முடி காணிக்கை செலுத்தும் இடங்களும் 24 மணி நேரமும் தங்கு தடையின்றிச் செயல்பட்டு வருகின்றன. நடப்பு கோடை விடுமுறைக்காலம் என்பதால் இதே போன்ற அசுர மக்கள் கூட்டம் இன்னும் அடுத்த சில வாரங்களுக்கும் தொடர வாய்ப்புள்ளதாகத் திருப்பதி நிர்வாகம் கணித்துள்ளது.