ஜூன் 22 ம் தேதி திருப்பதி செப்டம்பர் மாத  தரிசன டிக்கெட்டுகள்  வெளியீடு !  

திருப்பதி ஏழுமலையான் கோவிலுக்குச் சென்று இறைவனை வழிபடத் திட்டமிட்டுள்ள பல்லாயிரக்கணக்கான பக்தர்களின் வசதிக்காகத் திருமலை திருப்பதி தேவஸ்தானம் ஒரு முக்கிய அறிவிப்பை வெளியிட்டுள்ளது. இதன்படி   செப்டம்பர் மாதத்திற்கான 300 ரூபாய் சிறப்புப் பிரவேச தரிசன டிக்கெட்டுகள்  ஜூன் 22-ஆம் தேதி காலை 10.00 மணிக்கு இணையதளத்தில் முறைப்படி வெளியிடப்படவுள்ளன. ஆன்லைன் மூலமாக மட்டுமே இந்த டிக்கெட்டுகளைப் பெற முடியும் என்பதால், பக்தர்கள் அனைவரும் இதற்காக ஆவலோடு காத்துக் கொண்டிருக்கின்றனர்.

இதுதவிர செப்டம்பர் மாதத்திற்கான கல்யாண உற்சவம், ஊஞ்சல் சேவை, அர்ஜித பிரம்மோற்சவம் மற்றும் சகஸ்ர தீபாலங்கார சேவை போன்ற கட்டணச் சேவை டிக்கெட்டுகள் ஜூன் 22-ஆம் தேதி பிற்பகல் 3.00 மணிக்கு ஆன்லைனில் கிடைக்கும். மேலும், பக்தர்களுக்கான ஆன்லைன் குலுக்கல் முறையிலான சேவை டிக்கெட்டுகளுக்கான பதிவு ஜூன் 18 முதல் ஜூன் 20 வரை நடைபெற்று முடிந்துள்ளது குறிப்பிடத்தக்கது.

திருமலையில் தங்குவதற்கான அறைகளை முன்பதிவு செய்யும் வசதியானது ஜூன் 24-ஆம் தேதி காலை 10.00 மணிக்கு தேவஸ்தான இணையதளப் பக்கத்தில் முறைப்படி திறந்துவிடப்படும்.பக்தர்கள் எவ்வித ஏமாற்றமுமின்றித் தங்களது பயணத் திட்டங்களை முன்கூட்டியே வகுத்துக்கொள்ளும் நோக்கில் இந்தச் சேவை விபரங்கள் அனைத்தும் ஒரே நேரத்தில் முன்கூட்டியே அறிவிக்கப்பட்டுள்ளன. இணையதள நெரிசலைத் தவிர்க்கும் பொருட்டுப் பக்தர்கள் தேவஸ்தானத்தின் அதிகாரப்பூர்வ மொபைல் செயலி அல்லது இணையதளப் பக்கத்தை மட்டுமே பயன்படுத்திப் பதிவுகளைச் செய்யுமாறு அதிகாரிகள் கேட்டுக்கொண்டுள்ளனர்