அரசுப் பள்ளியில் மாணவிகளுக்கு பாலியல் தொல்லை... தலைமை ஆசிரியர் உட்பட 2 பேர் கைது!

திருவண்ணாமலை அருகே உள்ள அரசுத் தொடக்கப் பள்ளியில் 100-க்கும் மேற்பட்ட மாணவ, மாணவிகள் பயின்று வருகின்றனர். இந்தப் பள்ளியில் பணிபுரிந்து வந்த தலைமை ஆசிரியர் ரவி (58) மற்றும் இடைநிலை ஆசிரியர் முரளிதரன் (42) ஆகியோர் மாணவிகளுக்குப் பாலியல் தொல்லை கொடுத்து வந்ததாகப் புகார் எழுந்துள்ளது. பாதிக்கப்பட்ட மாணவிகள் 1098 என்ற சைல்ட் லைன் உதவி எண்ணிற்குத் தொடர்பு கொண்டு தங்களுக்கு நேர்ந்த கொடுமை குறித்துப் புகார் அளித்துள்ளனர். புகாரின் பேரில் மாவட்ட குழந்தைகள் நலத்துறை அலுவலர்கள், கல்வித்துறை அதிகாரிகள் மற்றும் காவல் துறையினர் நேரில் சென்று தீவிர விசாரணை நடத்தினர்.

அதிகாரிகள் நடத்திய நேரடி விசாரணையில், குறிப்பிட்ட 2 ஆசிரியர்களும் மாணவிகளிடம் பாலியல் சீண்டல்களில் ஈடுபட்டது உறுதி செய்யப்பட்டது. இதனைத் தொடர்ந்து திருவண்ணாமலை அனைத்து மகளிர் காவல் துறையினர் தலைமை ஆசிரியர் ரவி மற்றும் ஆசிரியர் முரளிதரன் ஆகிய இருவரையும் காவல் நிலையம் அழைத்து வந்தனர். அவர்கள் மீது போக்சோ சட்டத்தின் கீழ் வழக்குப் பதிவு செய்யப்பட்டு முறைப்படி அதிரடியாகக் கைது செய்யப்பட்டனர். கைது செய்யப்பட்ட இருவரும் திருவண்ணாமலை நீதிமன்றத்தில் ஆஜர்படுத்தப்பட்டு வேலூர் மத்திய சிறையில் அடைக்கப்பட்டனர்.

பள்ளியில் பயிலும் மாணவிகளுக்குப் பாதுகாப்பாக இருக்க வேண்டிய ஆசிரியர்களே பாலியல் அத்துமீறலில் ஈடுபட்ட சம்பவம் அப்பகுதியில் பெரும் அதிர்ச்சியை ஏற்படுத்தியுள்ளது. பாதிக்கப்பட்ட மாணவிகளுக்குத் தேவையான ஆலோசனைகளை வழங்கி உதவ குழந்தைகள் நலத்துறை அதிகாரிகள் தீவிர நடவடிக்கைகளை மேற்கொண்டு வருகின்றனர். மாணவிகளின் பாதுகாப்பை உறுதி செய்யும் வகையில் தவறு செய்தவர்கள் மீது கடும் சட்ட நடவடிக்கை எடுக்கப்பட்டிருப்பது பெற்றோர் மத்தியில் நிம்மதியை அளித்துள்ளது. அரசுப் பள்ளி தலைமை ஆசிரியர் உட்பட 2 பேர் போக்சோ சட்டத்தில் கைதான இந்தச் சம்பவம் திருவண்ணாமலையில் பெரும் பரப்பரப்பை உருவாக்கியுள்ளது.