பயங்கரம்...காட்டில் பீடி இலை பறித்துக் கொண்டிருந்த 4 பெண்கள் புலித் தாக்குதலில் கொடூரப் பலி!

மராட்டிய மாநிலத்தில் உள்ள சந்திராபூர் மாவட்டத்தின் அடர்ந்த காட்டுப் பகுதியில், நள்ளிரவைத் தாண்டிய அதிகாலை வேளையில் நெஞ்சை உலுக்கும் மாபெரும் விபரீத இயற்கைச் சோகம் ஒன்று அரங்கேறியுள்ளது. குஞ்சேவாஹி கிராமத்தைச் சேர்ந்த சுமார் 13 ஏழைப் பெண்கள், கோடைகால வாழ்வாதாரத்திற்காகப் பீடி தயாரிக்கப் பயன்படும் ‘டெண்டு’ எனப்படும் காாட்டு இலைகளைப் பறிப்பதற்காகச் சிண்டேவாஹி தாலுகாவில் உள்ள வனப்பகுதிக்குள் இன்று அதிகாலை கூட்டமாகச் சென்றுள்ளனர். அப்பொழுது அங்குள்ள அடர்ந்த புதர்களுக்குள் பதுங்கியிருந்த ஒரு கொடூரமான காட்டுப் புலி, இலை பறித்துக் கொண்டிருந்த பெண்கள் மீது திடீரென அசுர வேகத்தில் பாய்ந்து கொடூரத் தாக்குதலை நடத்தியுள்ளது.

கண் இமைக்கும் நேரத்தில் அரங்கேறிய இந்த அதிவேகப் புலித் தாக்குதலில், கூட்டத்தில் இருந்த கவ்துபாய் தாதாஜி மொஹுர்லே (45), அனுபாய் தாதாஜி மொஹுர்லே (46), சங்கீதா சந்தோஷ் சௌதாரி (36) மற்றும் சுனிதா கௌஷிக் மொஹுர்லே (33) ஆகிய 4 அப்பாவிப் பெண்கள் சம்பவ இடத்திலேயே ரத்த வெள்ளத்தில் பரிதாபமாகப் பலியாகினர். இவர்களில் 3 பெண்கள் ஒரே குடும்பத்தைச் சேர்ந்தவர்கள் என்பது கிராம மக்களிடையே மாபெரும் சோகத்தை ஏற்படுத்தியுள்ளது. புலியின் கோரத் தாண்டவத்தைக் கண்டு அடியோடு நடுங்கிப் போன மற்ற 9 சாமானியப் பெண்கள், தங்களது உயிரைக் காத்துக் கொள்ளக் காடே அதிரும் வகையில் அலறியடித்துக் கொண்டு கிராமத்தை நோக்கி ஓடித் தப்பினர்.

இந்த திடுக்கிடும் தகவல் காட்டுத்தீயாய் பரவியதைத் தொடர்ந்து, வனச்சரக அதிகாரி அஞ்சலி சயங்கர் தலைமையிலான வனத்துறையினர் மற்றும் உள்ளூர் சட்டம் ஒழுங்கு போலீசார் சம்பவ இடத்திற்கு விரைந்து சென்று 4 பெண்களின் உடல்களையும் மீட்டனர். தற்பொழுது முதன்மை வனப் பாதுகாவலர் ஆர்.எம்.ராமானுஜம் மேற்பார்வையில், அந்த நரமாமிசப் புலியின் நடமாட்டத்தைக் கண்காணிக்கத் தீவிர தேடுதல் வேட்டை முடுக்கிவிடப்பட்டுள்ளது