முருகப்பெருமானின் புகழ்பெற்ற அறுபடை வீடுகளில் இரண்டாம் படை வீடான திருச்செந்தூர் சுப்பிரமணிய சுவாமி கோயிலில் கந்தசஷ்டி திருவிழாவின் முக்கிய நிகழ்வான சூரசம்ஹாரம் வெகு விமரிசையாக நடைபெற உள்ளது. இதற்கான பாதுகாப்பு ஏற்பாடுகள் மற்றும் முன்னேற்பாடுகளைத் துறை சார்ந்த அமைச்சர்கள் மற்றும் உயர் அதிகாரிகள் நேரில் சென்று பார்வையிட்டு ஆய்வு செய்து வருகின்றனர்.

கோயில் வளாகத்தில் செய்யப்பட்டுள்ள முன்னேற்பாடுகளை அமைச்சர் ரமேஷ் அவர்கள் நேரில் ஆய்வு செய்து கொண்டிருந்தார். அப்போது திருவிழாவைக் காண வந்திருந்த பக்தர் ஒருவருக்கு திடீரென உடல்நலக் குறைவு ஏற்பட்டு வலிப்பு ஏற்பட்டது. கூட்ட நெரிசலில் மயங்கி விழுந்த அந்தப் பக்தரைக் கண்டதும் அங்கிருந்தவர்கள் அதிர்ச்சியடைந்தனர். இதைக் கவனித்த அமைச்சர் ரமேஷ், சிறிதும் தாமதிக்காமல் உடனடியாக அந்த இடத்திற்கு விரைந்து சென்றார்.

பாதிக்கப்பட்ட பக்தருக்குத் தேவையான முதலுதவி சிகிச்சைகள் கிடைக்க ஏற்பாடு செய்த அவர், உடனடியாக அவசர ஆம்புலன்ஸ் வரவழைக்கப்பட்டு, அப்பக்தரைத் தொடர் சிகிச்சைக்காக அருகில் உள்ள மருத்துவமனைக்கு விரைவாக அனுப்பி வைத்தார்.

அமைச்சரின் இந்தத் துரிதமான மற்றும் மனிதாபிமானச் செயல் அங்கிருந்த பொதுமக்களின் கவனத்தையும் பாராட்டுகளையும் பெற்றது. திருவிழா கூட்ட நெரிசலில் ஒரு பக்தரின் உயிரைக் காக்க அமைச்சரே நேரடியாக முன்னின்று உதவி செய்த சம்பவம் நெகிழ்ச்சியை ஏற்படுத்தியுள்ளது.