10-வது டி.என்.பி.எல். 20 ஓவர் கிரிக்கெட் தொடரின் லீக் ஆட்டத்தில் திண்டுக்கல் டிராகன்ஸ் அணியை 6 விக்கெட்டுகள் வித்தியாசத்தில் வீழ்த்தி நெல்லை ராயல் கிங்ஸ் அணி தனது 2-வது வெற்றியைப் பதிவு செய்துள்ளது.

திண்டுக்கல் மாவட்டம் நத்தத்தில் உள்ள NPR கல்லூரி மைதானத்தில் நடைபெற்ற இந்தப் போட்டியில் டாஸ் வென்ற நெல்லை ராயல் கிங்ஸ் அணி பந்துவீச்சைத் தேர்வு செய்தது. திண்டுக்கல் அணியின் தொடக்க வீரர் அனுராக் ராஜேஷ் 35 ரன்கள் எடுத்து நல்ல தொடக்கம் தந்தாலும், ஷிவம் சிங் (7) மற்றும் ஜெயந்த் (5) விரைவாக ஆட்டமிழந்தனர். அதிரடியாக விளையாடிய விமல் குமார் 45 பந்துகளில் 63 ரன்கள் (5 பவுண்டரி, 3 சிக்சர்) விளாசி அணியைச் சரிவிலிருந்து மீட்டார். ஹன்னி சய்லி 27 ரன்கள் எடுத்தார்.

20 ஓவர்கள் முடிவில் திண்டுக்கல் டிராகன்ஸ் அணி 7 விக்கெட் இழப்பிற்கு 170 ரன்கள் சேர்த்தது. நெல்லை அணி தரப்பில் வேகப்பந்து வீச்சாளர் சோனு யாதவ் 3 விக்கெட்டுகளைக் கைப்பற்றினார்.

171 ரன்கள் எடுத்தால் வெற்றி என்ற இலக்குடன் களம் இறங்கிய நெல்லை ராயல் கிங்ஸ் அணி, 17.4 ஓவர்களிலேயே 4 விக்கெட்டுகளை மட்டுமே இழந்து 172 ரன்கள் எடுத்து அபார வெற்றி பெற்றது. சந்தோஷ்குமார் 44 ரன்களும் (4 பவுண்டரி, 4 சிக்சர்), ஜி.அஜிதேஷ் 46 ரன்களும், முகிலேஷ் 43 ரன்களும் விளாசினர். இறுதியில் கேப்டன் சோனு யாதவ் 6 பந்துகளில் 19 ரன்கள் திரட்டி வெற்றி வாய்ப்பை எளிதாக்கினார்.

இந்தத் தொடரில் நெல்லை ராயல் கிங்ஸ் அணிக்கு இது தொடர்ந்து கிடைத்த 2-வது வெற்றியாகும். 2 ஆட்டங்களில் விளையாடியுள்ள திண்டுக்கல் டிராகன்ஸ் அணிக்கு இது முதல் தோல்வியாகும்.