விழுப்புரத்திலிருந்து திருவண்ணாமலைக்கு  சிறப்புத் தொடர்வண்டிகள் இயக்கம்!

திருவண்ணாமலை அருணாச்சலேஸ்வரர் திருக்கோவிலில் ஜூலை  29ம் தேதி புதன்கிழமை அன்று பவுர்ணமி கிரிவல நிகழ்வு நடைபெற உள்ளது. இந்த ஆன்மிக வழிபாட்டில் லட்சக்கணக்கான பக்தர்கள் நாடு முழுவதிலுமிருந்து பங்கேற்பார்கள் என எதிர்பார்க்கப்படுகிறது. இதனால் ஏற்படும் கூட்ட நெரிசலைத் தவிர்க்கும் வகையிலும், பொதுமக்களின் பயண வசதிக்காகவும் தெற்குத் தொடர்வண்டித் துறை சார்பில் விழுப்புரத்திலிருந்து திருவண்ணாமலைக்குச் சிறப்புத் தொடர்வண்டிகள் இயக்கப்பட உள்ளன.

இதன்படி  ஜூலை 29-ந்தேதி விழுப்புரம் தொடர்வண்டி நிலையத்திலிருந்து காலை 10.10 மணிக்கு முன்பதிவில்லா சிறப்புத் தொடர்வண்டி புறப்பட உள்ளது. வண்டி எண் 06130 கொண்ட இந்தத் தொடர்வண்டி காலை 11.45 மணிக்குத் திருவண்ணாமலை நிலையத்தைச் சென்றடையும். மறுமார்க்கத்தில் திருவண்ணாமலை நிலையத்திலிருந்து மதியம் 12.40 மணிக்கு வண்டி எண் 06129 புறப்பட்டு மதியம் 2.15 மணிக்கு விழுப்புரத்தை வந்தடையும் என அறிவிக்கப்பட்டுள்ளது.

இந்தப் பயணிகள் சிறப்புத் தொடர்வண்டியானது பயணிகளின் வசதிக்காக வெங்கடேசபுரம், மாம்பழப்பட்டு, ஆயந்தூர் ஆகிய இடங்களில் நின்று செல்லும். மேலும் திருக்கோவிலூர், ஆதிச்சனூர், அண்டம்பள்ளம், தண்டரை ஆகிய தொடர்வண்டி நிலையங்களிலும் இந்த வண்டி நின்று செல்லும் எனத் தெரிவிக்கப்பட்டுள்ளது. இந்த முக்கியத் தகவலைத் திருச்சி கோட்டத் தொடர்வண்டித் துறை மக்கள் தொடர்பு அலுவலகம் அதிகாரப்பூர்வச் செய்திக்குறிப்பில் தெரிவித்துள்ளது.