கோடையை கொண்டாடுங்க...  தென் மாவட்டங்களுக்குக் கூடுதல் சிறப்பு ரயில்கள்...  !

தமிழகத்தில் கோடை விடுமுறை தொடங்கிவிட்ட நிலையில், மக்கள் தங்களது சொந்த ஊர்களுக்கும் சுற்றுலாத் தலங்களுக்கும் செல்வது கணிசமாக அதிகரித்துள்ளது. பயணிகளின் கூட்ட நெரிசலைக் குறைக்கவும், பயணத்தை எளிதாக்கவும் தெற்கு ரயில்வே தற்போது பல்வேறு வழித்தடங்களில் கூடுதல் சிறப்பு ரயில்களை அறிவித்துள்ளது. குறிப்பாகத் தென் மாவட்டங்களை இணைக்கும் வகையில் தாம்பரம் – தூத்துக்குடி மற்றும் திருச்சி – பெங்களூரு இடையேயான சிறப்பு ரயில் சேவைகள் நீட்டிக்கப்பட்டுள்ளன.

தாம்பரம் - தூத்துக்குடி இடையே இயக்கப்படும் சிறப்பு ரயிலானது மே 5-ஆம் தேதி முதல் ஜூன் 9-ஆம் தேதி வரை செவ்வாய்க்கிழமை தோறும் இயக்கப்படும் எனத் தெரிவிக்கப்பட்டுள்ளது. இதேபோல், திருச்சி – பெங்களூரு இடையே மே 5, 12, 19 மற்றும் 26 ஆகிய தேதிகளில் வாராந்திர சிறப்பு ரயில்கள் இயக்கப்பட உள்ளன. இது தவிரத் தாம்பரத்தில் இருந்து தென்காசி மற்றும் செங்கோட்டை மார்க்கமாகவும் சிறப்பு ரயில்கள் இயக்கப்படுவதால் பயணிகள் பெரும் மகிழ்ச்சி அடைந்துள்ளனர்.

கூட்ட நெரிசலைத் தவிர்க்கப் பயணிகள் முன்கூட்டியே தங்களது பயணச் சீட்டுகளை முன்பதிவு செய்துகொள்ளுமாறு ரயில்வே நிர்வாகம் கேட்டுக் கொண்டுள்ளது. பயணிகளின் வசதிக்காகத் தாம்பரம் - தூத்துக்குடி ரயிலின் புறப்படும் நேரத்திலும் சில மாற்றங்கள் செய்யப்பட்டுள்ளதாக அறிவிக்கப்பட்டுள்ளது. கோடை விடுமுறையைக் கழிக்கத் திட்டமிடும் மக்களுக்குத் தெற்கு ரயில்வேயின் இந்த அதிரடி அறிவிப்பு ஒரு வரப்பிரசாதமாக அமைந்துள்ள நிலையில், இதற்கான டிக்கெட் முன்பதிவு விறுவிறுப்பாக நடைபெற்று வருகிறது.