மரங்களை வெட்டியதால் கதறி அழுத நில உரிமையாளர்... வைரல் வீடியோ !
கள்ளக்குறிச்சி அருகே உயர்மின்கோபுரங்கள் அமைப்பதற்காகத் தங்களது நிலத்தில் இருந்த மரங்கள் வெட்டப்பட்டதைக் கண்டு நில உரிமையாளர் மரத்தைக் கட்டிப்பிடித்துக் கதறி அழுதுள்ள காட்சிகள் காண்போரை மிகவும் கண்கலங்கச் செய்துள்ளன. கள்ளக்குறிச்சி அருகே உள்ள பகுதிகளில் உயர்மின்கோபுரங்கள் அமைக்கும் பணிகளுக்காகத் தனியார் நிலங்களில் இருந்த தேக்கு உள்ளிட்ட விலை உயர்ந்த மரங்களை மின்வாரிய அதிகாரிகள் வெட்டி அகற்றியதாகக் கூறப்படுகிறது. பல ஆண்டுகளாகக் கஷ்டப்பட்டு வளர்த்த மரங்களை இழந்த குடும்பத்தினரின் துயரம் அப்பகுதியில் பெரும் சோகத்தை ஏற்படுத்தியுள்ளது.
துரசலூர் கிராமத்தைச் சேர்ந்த செல்வி மற்றும் அவரது மகன் பாலமுருகன் ஆகியோர் தங்களது சொந்த நிலத்தில் மா, தேக்கு, தென்னை உள்ளிட்ட பல்வேறு மரங்களை கடந்த 10 ஆண்டுகளாகக் கண்ணும் கருத்துமாகக் காப்பாற்றி வந்துள்ளனர். இந்நிலையில் உயர்மின்கோபுரங்கள் அமைப்பதற்காக நில உரிமையாளர்களின் முறையான ஒப்புதல் எதையும் பெறாமல் காவல்துறை பாதுகாப்புடன் நூற்றுக்கும் மேற்பட்ட மரங்கள் வெட்டிச் சாய்க்கப்பட்டதாகக் கூறப்படும் குற்றச்சாட்டு எழுந்துள்ளது. தாங்கள் வளர்த்த மரங்கள் கண்முன்னே வெட்டப்படுவதைக் கண்ட உரிமையாளர்கள் கதறி அழுதது பார்ப்பவர்கள் அனைவரையும் சோகத்தில் ஆழ்த்தியுள்ளது.
சொந்த நிலத்தில் பல ஆண்டுகளாகப் போராடி வளர்த்த மரங்களை ஒரே நாளில் இழந்துவிட்டுத் தவிக்கும் குடும்பத்திற்கு உரிய நீதி வழங்க வேண்டும் என்று பல்வேறு தரப்பினரும் கோரிக்கைகளை முன்வைத்து வருகின்றனர். உரிய அனுமதியின்றி அல்லது தகுந்த முன்னறிவிப்பு இல்லாமல் மரங்களை வெட்டிய விவகாரம் அப்பகுதியில் உள்ள விவசாயிகளிடையே கடும் கொந்தளிப்பையும் அச்சத்தையும் ஏற்படுத்தியுள்ளது. இந்தச் சம்பவம் தொடர்பான முறையான விசாரணைகள் நடத்தப்பட வேண்டும் என்றும் பாதிக்கப்பட்டவர்களுக்கு உரிய இழப்பீடு வழங்கப்பட வேண்டும் என்றும் பொதுமக்கள் வலியுறுத்துகின்றனர்.