தவெக வெற்றி பெற வேண்டும்...  நடிகை ஐஸ்வர்ய லட்சுமி ஓபன் டாக்!

தமிழக சட்டசபை தேர்தல் முடிவுகள்  மே 4ம் தேதி வெளியாக உள்ள நிலையில், நடிகை ஐஸ்வர்ய லட்சுமி தமிழக வெற்றிக் கழகத்திற்குத் தனது ஆதரவைத் தெரிவித்துள்ளார். திருநெல்வேலியில் செய்தியாளர்களைச் சந்தித்த அவர், தமிழகத்தில் தவெக வெற்றி பெற வேண்டும் என்பதே தனது ஆசை என்று வெளிப்படையாகக் கூறினார். நடிகர் விஜய் மீது தமக்குள்ள ஈடுபாட்டையும், அவர் தலைமையிலான கட்சியின் அரசியல் பயணத்திற்குத் தனது வாழ்த்துக்களையும் அவர் பகிர்ந்துகொண்டார்.

தான் கேரளா மாநிலத்தைச் சேர்ந்தவள் என்பதால், தமிழகத்தில் தனக்கு வாக்களிக்கும் உரிமை இல்லை என்பது வருத்தமளிப்பதாக ஐஸ்வர்ய லட்சுமி தெரிவித்தார். நடிகர் விஜய்யை தமக்கு மிகவும் பிடிக்கும் என்றும், அவர் அரசியலில் சாதிக்க வேண்டும் என்பதே தனது விருப்பம் என்றும் அவர் நெகிழ்ச்சியுடன் குறிப்பிட்டார். தேர்தல் களம் சூடுபிடித்துள்ள நிலையில், திரைத்துறையைச் சேர்ந்த பிரபலங்கள் பலரும் தவெக-விற்குத் தங்கள் ஆதரவைத் தெரிவித்து வருவது அரசியல் வட்டாரத்தில் கவனத்தை ஈர்த்துள்ளது.

தமிழகத்தில் விறுவிறுப்பாக நடைபெற்று முடிந்த சட்டமன்றத் தேர்தலுக்கான வாக்கு எண்ணிக்கை இன்னும் இரு நாட்களில் தொடங்க உள்ளது. மே 4ம் தேதி காலை முதல் முடிவுகள் அறிவிக்கப்பட உள்ள நிலையில், ஐஸ்வர்ய லட்சுமியின் இந்த கருத்து விஜய் ரசிகர்களிடையே உற்சாகத்தை ஏற்படுத்தியுள்ளது. தவெக-வின் தேர்தல் முடிவுகள் எப்படி இருக்கும் என்ற எதிர்பார்ப்பு தமிழகம் முழுவதும் உச்சத்தை எட்டியுள்ள நிலையில், பிரபலங்களின் இத்தகைய ஆதரவு கூடுதல் பலமாகப் பார்க்கப்படுகிறது.