சென்னை தலைமைச் செயலகத்தில் இன்று  நடைபெற்ற தமிழக சட்டமன்றத்தின் 17-வது கூட்டத்தொடரின் முதல் நாள் அமர்வுக்குப் பின்னர், பிரதான எதிர்க்கட்சித் தலைவரும் திமுக செயல் தலைவருமான உதயநிதி ஸ்டாலின் செய்தியாளர்களைச் சந்தித்துப் பேசினார். அப்போது, பேரவையில் வாசிக்கப்பட்ட ஆளுநர் உரை மக்கள் நலனுக்கானதாக இல்லை எனக் குற்றம்சாட்டி, புதிய தவெக அரசு மற்றும் மத்திய பாஜக அரசுக்கு இடையே நிலவும் இணக்கம் குறித்துப் பல்வேறு அரசியல் விமர்சனங்களை முன்வைத்தார்.

சட்டமன்றத்தில் ஆளுநர் அர்லேகர் ஆற்றிய உரை குறித்துப் பேசிய எதிர்க்கட்சித் தலைவர் உதயநிதி ஸ்டாலின், அதில் தொலைநோக்குத் திட்டங்கள் எதுவும் இல்லை என விமர்சித்தார். "இன்று பேரவையில் வாசிக்கப்பட்ட ஆளுநர் உரை என்பது தமிழ்நாட்டு மக்களின் வாழ்வாதாரப் பிரச்சினைகளைத் தீர்ப்பதற்கானதாக இல்லை. மாறாக, ஆளுங்கட்சியினர் தங்களது சமூக வலைதளப் பக்கங்களில் 'ரீல்ஸ்' மற்றும் வீடியோக்கள் போடுவதற்கான ஒரு கவர்ச்சிகரமான உள்ளடக்கமாக  மட்டுமே அது இருந்தது. இந்த உரை முற்றிலும் காழ்ப்புணர்ச்சியுடன் கூடிய அறிவிப்புகளைக் கொண்டதாக அமைந்துள்ளது."

கடந்த ஆட்சிக் காலங்களில் சட்டமன்றத்தில் ஆளுநர் உரை நிகழ்த்தப்படும் போது ஆளுநருக்கும் அன்றைய ஆளுங்கட்சிக்கும் இடையே பல்வேறு கருத்து முரண்பாடுகளும் சர்ச்சைகளும் வெடித்ததைச் சுட்டிக்காட்டிய உதயநிதி ஸ்டாலின், தற்போதைய சூழல் மாறியிருப்பதாகக் குறிப்பிட்டார்.

தமிழ்நாட்டில் ஆட்சிப் பொறுப்பில் இருக்கும் தவெக அரசுக்கும், மத்திய பாரதிய ஜனதா கட்சிக்கும் இடையே ஒரு இணக்கமான சூழல் உள்நோக்கத்தோடு ஏற்பட்டுள்ளதைப் போன்று தோன்றுகிறது. அரசு தயாரித்துக் கொடுத்த உரையை ஆளுநர் எவ்வித வார்த்தை மாற்றமுமின்றி அப்படியே முழுமையாக வாசித்துக் காட்டியிருப்பது, இவர்களுக்கிடையேயான திரைமறைவு இணக்கத்தையே வெளிப்படுத்துகிறது என அவர் விமர்சித்தார்.