பிசியோதெரபி, ஆக்குபேஷனல் தெரபி, ஆப்டோமெட்ரி படிப்பு இனி 5 ஆண்டுகள்! UGC புதிய அறிவிப்பு

சுகாதாரம் சார்ந்த படிப்புகளின் கல்வித் தரம் மற்றும் பாடத்திட்டங்களில் ஒருமைப்பாட்டை ஏற்படுத்தும் வகையில் பல்வேறு முக்கிய மாற்றங்களை பல்கலைக்கழக மானியக் குழுவான UGC அறிவித்துள்ளது. அதன்படி, பிசியோதெரபி, ஆக்குபேஷனல் தெரபி மற்றும் ஆப்டோமெட்ரி ஆகிய இளநிலைப் படிப்புகளின் கால அளவு மாற்றப்பட்டுள்ளது.புதிய விதிமுறைகளின்படி, Bachelor of Physiotherapy (B.PT) படிப்பின் கால அளவு 4.5 ஆண்டுகளில் இருந்து 5 ஆண்டுகளாக உயர்த்தப்பட்டுள்ளது. இதேபோல் Bachelor of Occupational Therapy (B.OT) படிப்பும் 4.5 ஆண்டுகளில் இருந்து 5 ஆண்டுகளாக மாற்றப்பட்டுள்ளது. Bachelor of Optometry (B.Optom) படிப்பின் கால அளவு 4 ஆண்டுகளில் இருந்து 5 ஆண்டுகளாக அதிகரிக்கப்பட்டுள்ளது.

இந்த மாற்றங்கள் 2026-27 கல்வியாண்டு முதல் அமல்படுத்தப்பட உள்ளன. இதன் மூலம் நாடு முழுவதும் சுகாதாரம் மற்றும் Allied Healthcare துறைகளில் படிப்புகளின் பெயர், கால அளவு மற்றும் கல்வித் தரத்தில் ஒருமைப்பாட்டை ஏற்படுத்துவது முக்கிய நோக்கமாக உள்ளது.முதுகலை படிப்புகளிலும் முக்கிய மாற்றங்கள் செய்யப்பட்டுள்ளன. குறிப்பாக Master of Physiotherapy (M.PT) மற்றும் Master of Occupational Therapy (M.OT) ஆகிய படிப்புகளை வழங்கும் பல்கலைக்கழகங்கள், புதிய விதிமுறைகளில் குறிப்பிடப்பட்டுள்ள சிறப்புப் பிரிவுகளுக்கு ஏற்ப தங்களது பாடத்திட்டங்களையும் படிப்புகளின் பெயர்களையும் மறுசீரமைக்க வேண்டும் என தெரிவிக்கப்பட்டுள்ளது.

இதுமட்டுமின்றி, சுகாதாரம் மற்றும் Allied Healthcare துறைகளில் பல புதிய இளநிலை மற்றும் முதுகலை பட்டப்படிப்புகளுக்கும் அங்கீகாரம் வழங்கப்பட்டுள்ளது. Medical Laboratory Science, Emergency Medical Technology, Anaesthesia and Operation Theatre Technology, Nutrition and Dietetics, Medical Radiology and Imaging Technology, Radiation Therapy Technology, Respiratory Technology, Dialysis Therapy Technology, Health Information Management உள்ளிட்ட பல்வேறு துறைகள் இதில் இடம்பெற்றுள்ளன. மொத்தமாக 33 புதிய Allied Healthcare degree specifications சேர்க்கப்பட்டுள்ளதாக கல்வித்துறை சார்ந்த தகவல்கள் தெரிவிக்கின்றன.

இந்த புதிய விதிமுறைகள் ஏற்கனவே படித்து வரும் மாணவர்களுக்கு பின்னோக்கி அமல்படுத்தப்படாது. ஏற்கனவே சேர்ந்துள்ள மாணவர்கள் தாங்கள் சேர்ந்தபோது நடைமுறையில் இருந்த விதிமுறைகளின்படியே தங்களது படிப்பைத் தொடரவும் பட்டம் பெறவும் ஏற்பாடு செய்யப்பட்டுள்ளது. புதிய விதிமுறைகள் 2026-27 கல்வியாண்டுக்கான புதிய சேர்க்கைகளுக்கு முக்கியத்துவம் பெறுகின்றன.இதனால் 2026-27 கல்வியாண்டில் பிசியோதெரபி, ஆக்குபேஷனல் தெரபி, ஆப்டோமெட்ரி உள்ளிட்ட சுகாதாரம் சார்ந்த படிப்புகளில் சேர விரும்பும் மாணவர்கள், தாங்கள் தேர்வு செய்யும் பல்கலைக்கழகம் மற்றும் கல்லூரியின் புதிய பாடத்திட்டம், படிப்பு காலம் மற்றும் சேர்க்கை விதிமுறைகளை கவனமாக சரிபார்த்துக் கொள்வது அவசியமாகியுள்ளது.