உக்ரைன் - நெதர்லாந்து கைகோர்ப்பு...  போர் முனையில் அதிரடி ஒப்பந்தம்!

நெதர்லாந்து நாட்டுடன் இணைந்து ட்ரோன் தயாரிப்பு உள்ளிட்ட முக்கிய பாதுகாப்பு ஒப்பந்தங்கள் கையெழுத்தாகியுள்ளதாக உக்ரைன் அதிபர் ஜெலென்ஸ்கி உற்சாகமாகத் தெரிவித்துள்ளார். இது தொடர்பாக அவர் வெளியிட்டுள்ள எக்ஸ் தள பதிவில், இரு நாடுகளுக்கும் இடையிலான கூட்டுறவு இதன் மூலம் புதிய உச்சத்தை எட்டியுள்ளதாகக் குறிப்பிட்டுள்ளார். குறிப்பாக, வான் பாதுகாப்பு மற்றும் ஏவுகணைத் துறையில் நெதர்லாந்து அளிக்கும் தொடர் ஆதரவானது உக்ரைன் மக்களின் உயிரைக் காப்பதில் முக்கிய பங்கு வகிக்கிறது.

இந்த முக்கிய பயணத்தின் போது உக்ரைன் மக்களுக்கு வழங்கப்பட்ட நான்கு சுதந்திரங்களுக்கான விருதுக்காக நெதர்லாந்து நாட்டிற்கு அவர் தனது நெஞ்சார்ந்த நன்றியைத் தெரிவித்தார். நெதர்லாந்து மன்னர் வில்லெம்-அலெக்சாண்டர் மற்றும் மந்திரி ராப் ஜெட்டன் ஆகியோரின் கனிவான அணுகுமுறை போர்க்களத்தில் தங்களுக்குப் பெரும் ஊக்கத்தை அளிப்பதாக நெகிழ்ச்சியுடன் கூறினார். பொதுவான சுதந்திரத்தைப் பாதுகாப்பதில் நெதர்லாந்து மக்கள் காட்டும் உறுதி தங்களுக்கு மிகப்பெரிய பலம் என்றும் அவர் புகழாரம் சூட்டியுள்ளார்.

ரஷ்யாவுடனான போர் நீடித்து வரும் சூழலில், உக்ரைனுக்குத் தேவையான வான் பாதுகாப்பு அமைப்புகள் மற்றும் போர் விமான உதவிகளை நெதர்லாந்து தொடர்ந்து வழங்கி வருகிறது. இந்த ஆயுத உதவிகள் ஒவ்வொரு நாளும் உக்ரைன் நகரங்களில் உள்ள அப்பாவி மக்களின் உயிரைப் பாதுகாப்பதில் கவசமாகச் செயல்படுவதாக ஜெலென்ஸ்கி பெருமிதம் தெரிவித்தார். சர்வதேச நாடுகளின் இத்தகைய ஆதரவு, உக்ரைன் தனது மண்ணை மீட்டெடுப்பதற்கான போராட்டத்திற்கு மேலும் வலுசேர்ப்பதாக அரசியல் நோக்கர்கள் கருதுகின்றனர்.